البارت 221 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني
تكاو على طوموبيل كايرتاحو
أبراهام : عارف ايلا مشا سي أصلان عرف هادشي لي درنا اش غايدير فينا؟؟؟؟
مالك : حنا نفذنا غير أوامر ميستر أرسلان و خدامين عند ميستر أرسلان ماشي سي أصلان
أبراهام : شحاال من مرة قلت لك نهايتنا غاتكون بسبب ديك العافية لي سيفطوها لينا
الله ياخد فيهم الحق ( ترجمة ديال دوزيام 😂 )
مالك : ماعندنا مانديرو هادو هما الأوامر ديال ميستر أرسلان
أبراهام : واش عارف ايلا مشا حتى عرف سي أصلان بلي 2 مسلمين فالقصر ديالو فالوقت
الحالي اش غايدير فينا؟؟؟؟
مالك : هاديك هي البلاصة الوحيدة لي ماغايقلبوش فيها عليهم و ماغاطيحش لهم فالبال
و فالأول و الأخير هدا كان قرار ميستر أرسلان
أبراهام : اليهوود لي دمهم مخلط و ممنوع يحطو رجليهم فالقصر ميستر أرسلان بنفسو هو
لي منع هادشي و دابا فقلب قصرو كاينين 2 مسلمين اعداء و بإرادتو ... ها اش قاليه و
خلاه يتصدم ديك الصدمة حيت أرسلان فالأول و لحد الساعة حاط قانون فقوانين القصر
باش مايدخلش شي حد للقصر ديانتو مختالفة واخا يكون اصلو نص نص و مع ذلك ممنوع منعا
كليا فما بالك بالمسلمين لي ماكايحملهمش؟ ولكن هاد القرار الأخير لي عطا بحد ذاتو
كون يعرفو سي أصلان غايجيوه نوبات قلبية متتالية مع سكتة دماغية ختامية .
مالك : عارف هادشي ماكايتقبلوش العقل دابا نسا علينا هادشي و وجد راسك لهادشي لي
غاديين ليه
ابراهام : مستعد كل الإستعداد واخا عارف هادشي لي كانديرو فيه غلط فغلط
مالك : سواء يكون غلط ولا صحيح هادو هما الأوامر و حتى كون ماكانوش الأوامر
مايمكنش نخلي ميستر أرسلان يدخل لهاد التحدي بوحدو
أبراهام : الخليفة عالله
مالك : ماعرفتش شحال غايبقا مطول هادشي
أبراهام : ماكانظنش غايطول بزاف ولكن ا مالك الأمور بدات كاتخرج على السيطرة كون
قتلناها شحال هادي كاع ماكان غايوقع هادشي
مالك : ماتفكرش فيها ا أبراهام واياك تفكر ديرها
أبراهام : علاش؟؟؟
مالك : واش عرفتي شنو هي ميستر أرسلان باغي يواجه رجال جدو باش يحميها؟؟؟؟؟
أبراهام : ولكن هاكا ماكايتسماش مواجه سي أصلان كايتسما مواجه غير رجالو
مالك : نتمنى هادشي مايوقعش
أبراهام : ماغايوقعش و مستحيل يوقع
مالك : كلشي وليت كانتوقعو
أبراهام : وليت كانشك فشي حاجة
مالك : وليت متأكد منها ماشي غير كانشك فيها
أبراهام : ههههه لا مايمكنش واقيلا غير تخايلنا ولكن علاش عيط لينا ب2 و قالينا
نجيو بلا مانجيبو معانا حد؟؟؟
مالك : شكيت غادي نواجهو رجال سي أصلان
أبراهام : ماكانظنش
مالك : كلشي ممكن
أبراهام : و لكن ماشي تال ديك الدرجة كاع
مالك : درتي داكشي لي قالينا ميستر أرسلان؟؟
أبراهام : وي درتو و راهم فالطريق
♚ موقف اللوطو ديالو حدا الميناء و متكي عليها و فالداخل كاينا ريماس لي كاتفكر فشنو
جاي .. وقفات طوموبيل خرا قدام لوطو ديالو خرج منها مالك و أبراهام عطاوه التحية
أبراهام : ميستر أرسلان صافي درنا اش قلتي لينا
أرسلان : فين خوتها!!
أبراهام : فالقصر ا ميستر أرسلان
أرسلان : كاين شي خبار جديدة!؟
أبراهام : وي ميستر أرسلان قدرنا نعطلو رجال سي أصلان باش يقدرو رجالنا يوصلو قبل
منهم
مالك : ميستر أرسلان العائلة ديالها ماكايناش غير فالمغرب
أرسلان : عارف
أبراهام : ولكن تكلفنا بكلشي و حتى من اصدقاء عائلتها
مالك : حتى من عمها و مراتو لي فالحبس سيفطنا لي يحميهم
أرسلان : ( ببرود ) لغي هاد اللخرانيا و جيبهم ليا
مالك : حاضر ميستر أرسلان .. وقفو طوموبيلات خرين و خرجو منهم رجال .. نفس الرجال
لي سيفطهم سي أصلان توجهو لجهة أرسلان لي كان كايشوف فيهم بملامح خالية من
التعابير
***** : ميستر أرسلان ... يتبع
البارت 222 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
أرسلان : كانسمع
***** : ميستر أرسلان سي أصلان سيفطنا باش نديو معانا ريماس
أرسلان : ( ببرود ) لا
***** : ولكن هادو أوامر سي أصلان لي أكد علينا باش مانرجعوش إلا و هي معانا
أرسلان : رجع للقصر انا غانجيبها
***** : ولكن ا ميستر أرسلان..
أرسلان : نعاود هضرتي؟
***** : ماقصدتش نتحداك ولكن هادو هما أوامر سي أصلان و ماغانمشيو إلا اذا كانت
فيدينا
أرسلان : قرب لعندي
***** : ماجيناش باش نواجهوك ا ميستر أرسلان جينا بغينا نديو معانا البنت و نمشيو
أرسلان : قرب لعندي .. مشا قرب لعندو كأنه ماخايفش من أرسلان حيت كايبقا من رجال
سي أصلان ماشي من رجال أرسلان و فالوقت الحالي سي أصلان مرتبتو كبر من مرتبة
أرسلان بيان سيغ حيت هو صاحب إمبراطورية روتشيلد فحاجة طبيعية يتبعو أوامرو .. مع
وصل لعندو طردق لو عنقو بيديه بحركة بسيطة خلاه يطيح جثة هامدة .. مشا لجهة
طوموبيلتو و جا واحد من رجال سي أصلان بغا يهضر مع أرسلان ولكن هز عليه أبراهام
الفردي و لاخر فاش شاف أبراهام هز الفردي هز حتى هو على ابراهام الفردي .. مالك
شافهم بداو يجبدو السلاح رجع لطوموبيل و جبد الكلاشنكوف لي كان جايبو للضرورة
الباقيين شافوه هز الكلاشنكوف حتى هما جبدو سلاح و صوبوه لناحية مالك و أبراهام
بقا واحد هاز الفردي على الثاني
أرسلان : هبطي
ريماس : ماغانهبطش حتى نشوف خوتي قدامي ... زفر بعدم صبر
أرسلان : ماغاتهبطيش؟! .. شدها من دراعها باش يجرها و نطرات دراعها من يديه
ريماس : غانهبط راسي بلا ماتمسني .. نيرفاتو فمرة ، واقعين فمشكل كبير و باقا
مقصحة راسها معاه .. هبطات من لوطو و وقفات كاتشوف فيه
أرسلان : ماغاننساش لك هادشي تسناي نسالي ليك
ريماس : هاني هبطت فين خوتي؟؟؟ .. ماجاوبهاش شد يديها بين يديه و مشا لجهة دوك
رجال لقاهم فالإستعداد للهجوم .. شافت هاد الحيحة لي واقعة و عاودات شافت ملامح
أرسلان لي ماكايبشروش بالخير داكشي علاش لقات احسن حل باش تبقا سالمة لخوتها هي
تسايرو شوية حتى توصل لمرادها و لي باين دابا هو براسو محطوط فموقف ماشي فصالحو و
خصوصا انها عمرها شافت شي حد هاز سلاح على رجالو حتى اليوم و منين هادشي واقع دابا
فأكيد لامشات حتى وقعات ليه ولا لرجالو شي حاجة ماغاديش تبقى عندها الفرصة باش
تبقا حية .. خلات يديه شادين يديها و قررات تكتافي غير بالمراقبة
أرسلان : نزلو السلاح .. بداو كاينزلوه واحد بواحد و عينيهم فيديهم لي مشادين و
هنا تثبتو شكوك أبراهام من جهة أرسلان
***** 2 : ميستر أرسلان عطينا البنت
أرسلان : رجعو للقصر حتى نجيبها فيدي
***** : ( حنا راسو ) واخا ا ميستر أرسلان ... تراجعو رجال أصلان اللور بينما
أرسلان مشا لجهة اليخت ديالو و فيدو ريماس لي مراقبة الوضع كاتحاول تفهم اش واقع و
علاش كانو هازين السلاح على أبراهام و مالك .. طلع لليخت و تبعو مالك اما أبراهام
عيط لرجال لي يجيو يديو طوموبيلات .. طلق يديها و جبد طيلي ديالو دوز واحد نمرة و
بعد باش يهضر .. هي ضراتها فراسها حاجة وحدة علاش دوك رجال بغاو يديوها لعند هاد
سي أصلان
مالك : ريماس شوية؟؟
ريماس : علاش بغاو يقتلوني؟
مالك : هادشي جوابو عندك نتي
ريماس : جدو هو نفسو سي أصلان؟؟
مالك : وي هو نفسو
ريماس : ياك هداك جدو إذا علاش غايبغي يقتلو
مالك : ماشي بغا يقتل ميستر أرسلان الهدف كنتي نتي ولكن ميستر أرسلان مابغاش يخليك
ليهم
ريماس : فنفسها ( جاه تأنيب الضمير يا سبحان الله ) و دابا حنا فين غاديين؟؟؟
ناويين تلوحوني فالبحر مثلا؟
مالك : غاديين لقصر إمبراطورية روتشيلد ( تحنا لعندها ) نصيحة اخيرة ليك و حاولي
ديري بيها هاد المرة ايلا كانت كاتهمك مصلحتك و مصلحة عائلتك
ريماس : شنو هي
مالك : فاش توصلي واياك ثم واياك تتجاوزي حدودك مع شي حد وسط القصر حيت ميستر
أرسلان ماغايترددش باش يقتلك قدامهم هادشي ايلا ماقتلوكش هما نيت ... يتبع
البارت 223 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
أرسلان : مالك ... سمعو و هو يتقاد فالوقفة بقا أرسلان كايشوف فيه بنظرات غريبة
حيت كان حاني شوية و كايهضر بصوت منخفض مع ريماس
مالك : وي ميستر أرسلان
أرسلان : تبعني
مالك : حاضر ميستر أرسلان
بقات كاتفكر فهاد الحريرة المحرحرة لي واقعة دابا كيفاش هو باغي ينقذها و هو دايها
بيديه لعند جدو؟؟ شنو زعما بغا يزيد يكبر فعين جدو ولا كيفاش .. و خوتها دابا
فينهم و علاش جدو باغي يقتلها واش زعما الخبار وصلات لجدو هه لا لا مايمكنش واقيلا
باغي يقتلها على ود الحرب و صافي ولكن بلاتي كلشي ممكن منين عندهم هاد النفوذ
كاملة و كل شوية طالع هابط للمغرب و زويينة هي كايطلع و يهبط فطائرة خااصة ،
كايقتل فبنادم بحالا ماكاينش القانون و حتى واحد ماكايهضر معاه بدات كاتراجع
تصرفاتها معاه و تصرفاتو معاها و كاتراجع الأغلاط البسيطة لي ماتو عليها ناس كانت
حاضرة فاش قتلهم شوية بشوية بدا كايتوضح لها معامن طاحت و علامن كانت كاتزعم هادشي
ماخلعهاش ولكن زاد لها نقطة فالبال و هي منين ماناويش يقتلها هي اكيد غايبغي يدوز
لعائلتها و هاكا غاتكون خاطرات بيهم .. جا جلس حداها و هي عقلها باقي ساهي كايفصل
و يخيط فداكشي لي دارت و داكشي لي مقررة ديرو لقات الحل المزيان هو تبع هضرة مالك
و قبل مادير شي خطوة حتى ضرب لها الف حساب و حساب حيت باينا هاد العالم لي دخلات
لو يا غاتخرج منو ميتة هي و عائلتها يا غاتبقا فيه
أرسلان : عطي الراحة لداك الدماغ المغرب ماباقيش غاترجعي ليه
ريماس : ( بإستغراب ) كيفاش ... مد لها علبة الإسعافات
أرسلان ضمدي لي الجرح
ريماس : و علا.. واخا ارا لهنا .. كانت ناويا تبدا ولكن عاودات سحبات كلامها باش
تبدا فداكشي لي خططات ليه و بلا مايمشي بالكم بعيد حيت هي ماناوياش تخليه يطيح
فشباكها 😂 علمتكم من دابا باش مايسافرش بالكم
بعيد و يرجع على رجليه .. بقا كايشوف فيها حتى دخل لها الشك فراسها
ريماس : مالك كاتشوف فيا بحال هاكا؟
أرسلان : بغيت
ريماس : حيد القاميجة باش نقدر نداوي لك الجرح
أرسلان : عطيتك تداويني بمعنى كلشي غاديريه نتي
ريماس : هادي راه سميتها قلت الحيا
أرسلان : حشمتي؟
ريماس : ماعندي علاش نحشم
أرسلان : ( ببرود ) حيديها اش كاتسناي
ريماس : كاتأمر فيا؟؟؟
أرسلان : عتابريه أمر .. طلب .. لي دخلات لداك الدماغ .. تأفأفات و نعلات الساعث
لي سيفطوها فيها باش تكون جاسوسة هما تهناو فحياتهم و هي غرقات فمشاكل كباااار و
ماعندهم حد ولا بغات تتفك منهم خاصها تبدا تفكر بعقلها و تخدم معاهم تاحراميات باش
تسلك راسها حيت هاد البشر هادا مايصلاح معاهم .. حطات ديك العلبة و تقادات فالجلسة
عقدات حجبانها بدات كاتحل فصدايف ديال القميجة لي لابس و عينيه عليها
أرسلان : عندك نقاط ضعف بزاف
ريماس : لا
أرسلان : نفس الجواب ديال ديك المرة
ريماس : اينا مرة من المرات
أرسلان : إيفا
ريماس : مابقيتش عاقلة و نسيت
أرسلان : نسيتي ولا مابغيتيش تفكري اش وقع
ريماس : ماوقع والو لي يخليني نبغي نتفكر ماكنتش فوعيي فديك الفترة ( بعصبية ) و
نتا ستغليتي هادشي و بقيتي كاتتقرب مني .. كاتهضر و كاداويه
أرسلان : ( بإبتسامة خبيثة ) و شكون هضر على داكشي!! انا سولت على نقاط الضعف
ريماس : حتى انا هضرت عليهم
أرسلان : علاش كاتكدبي بزاف
ريماس : ماكانكدبش
ارسلان : عاودتي ... جمعات عندها يديها و هزات فيه عينيها
ريماس : ماعنديش نقاط الضعف و ماكدبتش .. شد لها يديها و رجعها لجهة كتفو و مع ديك
جرة لي جرها زادت قربات كتر و كتر تنفضات بغضب
أرسلان : كملي اش بديتي
ريماس : هاني كانكمل ... مازادوش هضرو جات الوقيتة ديال الخياطة و بدات كاتخيط ليه
الجرح و مركزة تركييز مع الخياطة هاكا هي فاش كاتبغي دير شي حاجة خاصها ديرها
متقونة
أرسلان : حبسي
إيفا : نعام؟
أرسلان : ماتزيديش تعضي فشنايفك ... عاد طلعات معاها بلي من صباح و هي كاتعضهم فاش
كانت كاتخيط الجرح شافت فيه بغضب شوف هي فاش كانت ملهية و هو فاش كان ملهي
ريماس : ساليت .. تمات نايضة و عاود جرها من يديها جات جالسة ... يتبع
البارت 224 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
ريماس : ياك صافي ساليت؟ .. ناض من بلاصتو و جرها من يديها
ريماس : غير طلق يدي غانتمشا بوحدي واش كل شوية جارني لقنت؟؟؟؟ .. ماجاوبهاش و
اخيرا وصلو قدام واحد الباب حلها و دخلها و سد الباب موراهم لتافتات باش تشوف
فإينا جريحة دخلها تاني ... كانت غرفة نوم و تشوفها تحلف بالحلوف ديك الغرفة كاينا
فشي فيلا ولا فشقة فاخرة ماشي فيخت .. حيطانها مصبوغين فلون البيج من غير واحد
الحائط لي كان عبارة على حيط حجري فالرمادي المغلوق و الوسط كاينا ناموسية مغطاة
بغطاء فالأسود و فيه زخارف فالرمادي و فالقنت كاين فوطوي و فالجانب الاخر من البيت
كاينا خزانة فالرمادي سد الباب و قلب الدورة لعندها لقاها كاتشوف فيه بغضب
ريماس : علاش جايبني لهنا؟؟؟؟؟ و علاش سديتي الباب؟؟؟
أرسلان : الصمت .. مشا لجهة الخزانة جبد لها سورفيط من سورفيطات ديالو باش ماتدخلش
للقصر بديك الحالة و لاحها لها
ريماس : اش غاندير بحوايجك؟؟
أرسلان : لبسيهم .. جبد قاميجة بالأسود و بدا كايلبسها .. هزات ريماس ديك سورفيط
بدات كاتشوف فيها مهم ماشي كبيرة بزاف ولكن غاتجيها مخرخرة مقارنة بين فصالتو و
فصالتها
ريماس : تقدر تخرج بغيت نبدل حوايجي
أرسلان : بدليهم شكون حبسك
ريماس : نبدلهم و نتا هنا؟؟؟
أرسلان : حاجة طبيعية منين موالفا تخرجي نصك عريانة ماكانظنش غايكون عندك فرق سواء
شفت ولا ماشفتش .. تقرصات فاش قالها هاد الهضرة و طلع لها الدم كون ماكانش هاد
الوحلة لي هي فيها دابا كون صفاتها ليه و تهنات .. مشات مور أرسلان باش زعما ضمن
ماغايدورش لعندها
ريماس : مادورش راني كانبدل .. ضار لعندها
أرسلان : كاتحشمي؟!
ريماس : راني كانبدل واش غانبدل قدامك؟؟؟؟ ... مشات رجعات موراه عاوتاني و بدات
كاتلبس ما جا فين يدور حتى لقاها لبسات بقا خاصها غير تقاد دوك الخناشي لي لابسة
طلعها بنظراتو و هبطها
أرسلان : ماتخليهاش عادة عندك .. ماعزيزش عليا لي يلبس حوايجي
ريماس : ياك نتا لي عاد عطيتيهم لي؟؟؟ ... بدا كايقرب لعندها و هي ملهية مع الكمام
لي كاطويهم و سيور ديال سورفيط لي كاتزيرهم .. وصل لقدامها شافت صباطو لي واقف
حداها بدات كاطلع راسها فيه لقاتو واقف قبالتها .. هز يديه و بدا كايدوز صبعانو
على شعرها الأسود و تنهيدة صغيرة خرجات من فمو الشيئ لي خلاها تزيد تبعد عليه اصلا
ماكاتحملوش يقرب لها شي حاجة كبييرة ماكاتخليهاش ترتاح لهاد الإنسان واخا يدوزوه
لها فالعسل تمص العسل و تخلي أرسلان ... بدات كاترجع اللور و كاتشوف فعينيه لي
نظراتهم كانو فعلا مختالفين هاد المرة و بقوة لي بقات مقابلة عينيه ماحساتش
بالمسافة لي بقات كاتبعد فيها حتى لقات راسها مكالية مع الحيط و أرسلان كايقرب
شوية بشوية و المسافة بيناتهم غادا و كاتصغار بغات تزيد تبعد راسها ولكن كالاها
الحيط .. وصل لعندها و حط يد على الحيط و اليد الثانية هزها حطها على شعرها سامح
لصبعانو يتغلغلو وسط شعرها المسبسب نطق بصوت مخدر
أرسلان : خايفة مني؟! ( بقا كايضور عينيه على وجهها )
ريماس : بعد شوية لهيه و خلينا نتفاهمو بالعقل راه هاد الأسلوب ماكايعجبنيش
أرسلان : ( بنفس النبرة ) واش كانخلعك!! ... حيدات ليه يديه من شعرها بغضب
ريماس : بعد لهيه شوية راني ماقادراش نتنفس
أرسلان : جاوبي
ريماس : ماكانخافش منك و ماكانخاف من حد ... حرك صبعو لحناكها و بدا كايدوزهم عليه
ببطئ حسات بحالا ضربها الضو و دفعاتو بيديها بجوج .. بغات تمشي و عاود جرها رجعها
لبلاصتها ولكن هاد المرة شد لها يديها و بدا كايتمعن فعينيها
أرسلان : بلاصتك من اليوم غاتكون معايا ... يتبع
البارت 225 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
♜ فالقصر ♜
سي إيتان : كيفاش وقع هادشي؟؟؟؟؟
سي أصلان : ( كايغوت ) مااااااابغاش يتفهم ليا كيفاش بين ليلة و ضحاها عائلتها و
كاع صحابها غبرو لهم الأثر
سي إيتان : مايمكنش هادشي يوقع مايمكنش .. واش هما ليبرا باش يتلفو؟؟؟؟ اكيد كاين
شي غلط
سي أصلان : الغلط لي كاين هو شي واحد تلاعب بيا
سي إيتان : شكون غايتجرأ يديرها؟؟؟؟ أرسلان مايديرهاش مايمكنش يدير حاجة بحال هادي
سي أصلان : عارفو مايديرهاش و مستحيل يفكر فيها ولكن شكووون كايلعب معااايا
أسوار : يقدر يكون مورغان سبقك ليهم و قتلهم
سي إيتان : إحتمال كبيير يكون هو لي دارها من داكشي لي عاودتي لي توقع منو اي حاجة
سي أصلان : هداك حسابو معايا هو اللخر
حس باليخت وقف و بعد عليها .. خرج من البيت بلا مايسمع جواباتها لقا مالك كايتسناه
و يديه اليسرى ملوي عليها الفاصمة
مالك : ميستر أرسلان
أرسلان : عاقل على هضرتي مزيان!!
مالك : ( حاني راسو ) وي ميستر أرسلان و داك الخطأ ماغايتكررش مرة خرا
أرسلان : المرة الجاية غاتجي فراسك
مالك : الصمت ... خرجات من تما لقاتو واقف مع مالك بقات واقفة فبلاصتها باش بلا
مايشوفها و يدير عاوتاني شي تصرف مايعجبهاش و منها نيت باش يسبقها باش حتى لاكانت
شي مشكلة يبداو بيه هو اللول .. لقا مالك شاف فواحد الجهة و حدر راسو
أرسلان : تعلمتي .. ضار لعندها لقاها واقفة غير شافتو قلبات وجهها لجهة لاخرا بينما
مالك غير شافها خرج من تما بسبب التحذير لي عطاه أرسلان فاش لقاه حاني كايهضر
معاها و عيط عليه .. ماقتلوش ولكن ضربو بقرطاسة للرحا ديال يديه كتحذير صغير
ريماس : غانلقا خوتي هنا؟؟؟ .. رجع لعندها بغا يشدها من يديها باش يخرجو ولكن
رجعات يديها اللور
أرسلان : اري يديك
ريماس : لا .. جا يعاود يشدها و رجعات باللور
أرسلان : غانبقا كانلعب معاك هنا؟
ريماس : عندي رجلي نمشي بيهم بلا ماتبقا جارني كي البهيمة .. لاصق يديه بجوج و
حطهم تحت فمو
أرسلان : بغيتي تبقاي عايشة نتي و خوتك؟!
ريماس : غاطلب شي مقابل؟؟
أرسلان : غا تقطعي الحس و صوتك مانسمعوش و هاد زعامة ديالك حيديها
ريماس : كاتأمرني عاوتاني؟؟
ارسلان : كاننصحك .. حيت تيقي بيا ايلا درتي تصرف واحد غالط فالقصر هاد المرة
ماغانترددش باش نصفيها لك .. زاد و خلا ريماس واقفة فبلاصتها هاد المرة كايبان بلي
كايدوي بالفري اصلا هو ديما كايبان جدي كتر من القياس .. ولكن فاش فكرات مليا
فالموضوع لقات بلي الموقف لي محطوطة فيه و الزمان و المكان ماكايسمحوش ليها باش
دير شي تصرف تندمو بيه على كاع داكشي لي دار و داكشي لي باقي كايدير .. خرجات من
اليخت لقات راسها فبلاصة كالجزيرة و فعلا كانت جزيرة .. نزلات من تما لقاتو
كايتسناها و فيديه طيلي و قدامو طوموبيل راكب فيها واحد الشخص و الظاهر راه شيفور
.. ركبات اللور باش بلا ماعاد يبدا فهضرتو ركبي ماتركبي دازت ربع ساعة عاد طلع هو
.. ديمارا الشيفور و شد الطريق ديال القصر .. كل ما كايقربو قلبها كايزيد يتزير عليها
كيف لا و هي غادخل لغار الأفاعي او بالأحرى لوكر الذئاب .. كاع لي فالقصر عرفو
أرسلان جايبها معاه و كاع لي فالقصر محلفين فيها و كل واحد فيهم كايقول غادي تموت
على يدي ... يتبع
البارت 226 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
وصلو للقصر و حلو لهم البوابة .. بقاو غاديين مدة عاد وقفات طوموبيل قدام القصر و
ها هي و اخيرا وصلات للوكر ديالهم فين مجموعين كاملين .. نزلو من اللوطو دايرا
فبالها واخا يوقع لي يوقع مادير حتى شي تصرف لي يرجع بالضرر على خوتها و تحل هاد
المشكل بأي طريقة .. وقف بوقفتو الإعتيادية رجعو ملامحو لنفس الملامح ديال ديما
الخالية من التعبير وقفو ريماس و مالك حتى هما قدام الباب ديال القصر لي كان مزال
مسدود .. تحلات الباب الثانية و دخل أرسلان تبعاتو ريماس و تبعهم مالك .. كان
سكااات كالعادة فالقصر حس دبانة ماكاتزنزن كايبان بلي حتى واحد ماكاين فالقصر ولكن
العكس اليوم فين مجموع كلشي .. قصر من لداخل و من برا داير كالمتاهة كبير بزااف
ولكن البناء و الأثاث و ديكور ديالو أنيق بكل معنى الكلمة كايتسمع فيه غير صوت
صبابطهم لي كايتمشاو .. وصلو قدام باب كبيرة فالأسود و الأبيض بدون مايدق حلها و
دخل بقات ريماس و مالك على برا هي كاتشوف فمالك باش يجاوبها زعما يعطيها شي شرح شي
جواب حيت هو لي موالف مرة مرة يشرح لها ولكن هاد المرة هو براسو جبد طيلي و تصنع
الإنشغال باش يتفادى اي سؤال و اي حوار و اي نقاش معاها
♚ دخل للصالة المخصصة لإجتماعات افراد العائلة لقا رجال عائلة روتشيلد كلهم
مجموعين تما من صغيرهم لكبيرهم .. ماشافش فالحاضرين قصد غير جدو مشا سلم عليه و
بقا واقف
سي أصلان : جلس علاش بقيتي واقف؟
أرسلان : توقعت يكونو وصلو لك الخبار ا جبدي
سي أصلان : وصلوها ولكن كانتسنا التفسير
أرسلان : التفسير ديالاش بالضبط
سي أصلان : جايبها معاك فيديك؟ مدخلها حتى للقصر؟؟؟ سمعني ا ولدي أرسلان لحد
الساعة عاطيك مكانة مميزة على باقي ولادي و حفادي هادشي حيت عارفك كي داير و عارف
مايمكنش تخذلني فشي نهار و عارف ماغاطيحش راسي للأرض ولكن هادشي لي بدا يوقع مؤخرا
مابقاش عاجبني و باغي ليه تفسيرات
أرسلان : بحالاش هاد الحوايج؟
سي أصلان : داكشي لاخا تا نكونو فيه انا وياك و نهضرو فيه .. بغيت تفسير علاش جبتي
ديك المغربية للقصر؟ من بين قواعد القصر لي حطيتيهم بنفسك كانت قاعدة ممنوع يحط شي
حد رجليه فالقصر ايلا كان متبع دين غير ديننا
غابريال : لحد الساعة حتى واحد ماخالف هاد القاعدة من غيرك نتا لي حطيتيها و نتا
نيت لي خالفتيها
أرسلان : هضرتي مع جدي ا غابريال ماشي معاك
سي أصلان : فاش نكون كانهضر مع شي واحد فيكم الباقي مايتدخلوش فالموضوع .. أرسلان
باقي كانتسنا الشرح ... جلس أرسلان فجنب جدو بنفس الجلسة المعتادة
أرسلان : جدي كانظن نتا لي عطيتي أمر باش يجيبوها لك مع العلم كنتي قادر تطلبها
مني و نجيبها فيديك ولكن مادرتيهاش و فضلتي تيق فرجالك عليا .. بهاد السرعة
مابقيتيش تيق فيا؟!
سي أصلان : القضية ماشي قضية ثقة
أرسلان : القضية و ما فيها وليتي كاتشك فيا و فقدراتي بلي ماقادرش نجيبها فيدي
سي أصلان : هادشي غايبان اش من موراه و غايتوضح دابا
أرسلان : و انا على إستعداد
سي أصلان : دخلها لهنا
أرسلان : ماالك .. عاودات تحلات الباب و دخلات ريماس و مالك .. بدات كاتشوف
فالحضور لي كاين منهم لي شافتو و عرفاتو حيت فاش كانت بشخصية إيفا طلاقاتهم
فالكلينيك و كاين منهم لي هادي أول مرة تعرفهم .. جامعاهم حاجة وحدة و هي ريماس
ماحاملاهم ما قابلاهم .. توجهو جميع الأنظار عليها ولكن ماشي نظرات الإعجاب حيت
عائلة روتشيلد عائلة متشددة لأبعد الحدود .. نظراتهم ليها كانو بحال شي أسود
فريستهم دايزا من حداهم و قدام عينيهم كايتسناو غير الفرصة لي ينقضو عليها ...
يتبع
البارت 227 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
وقفات كاتشوف فيهم ... فهاد اللحظة نظراتهم كلهم و بيما فيهم هي كاتدل بلي باغيين
يفرسوها و هي حية ... هدا كايقول انا لي غانطير لها راسها و الثاني كايقول انا لي
غانفركع لها راسها و الثالث كايقول انا لي غانلوحها للكلاب يفرسوها و لاخر كايقول
هداو هداو موتها على يدي ... بينما هي كاتقول كون كانت عندها شي قنبولة كون فركعات
الخرا كامل ماحدا مجموعين كاملين و تهني البشرية منهم ... سبحان الله عندهم مشاعر
متبادلة ماكايحملوها ماكاتحملهم .. كلشي حاط يديه على جنبو كإستعداد غير يقول سي
أصلان قتلوها يرجعوها غربال و هادشي شايفو أرسلان ... شايف نظرات الكره لي بيناتهم
و شايفهم كيفاش كايتسناو غير كلمة من عند جدو .. بقا جدو كايطلعها و يهبطها و نطق
سي أصلان : هدا هو حفيدي سبع لي كانعرف .. ماجيتش و سميتك أرسلان غير هكاك
أرسلان : ماكانظنش باقا نفس الثقة ا جدي ولكن على العموم ماحتاجيتيش طلبها مني باش
تجيبها و ها هي قدامك المرة الجاية ختار الرجال لي تكلفهم بحوايج بحال هادو بدقة
.. عقد حجبانو و ناض من تما و باين فيه ماشي هو هداك .. ريماس غير شافتو غايخرج من
تما و يخليها وسط هادو تحلو عينيها و هضرات بالدارجة
ريماس : فين غادي؟؟؟
( بالعبرية )
غابريال : و باقا كاتهضر بديك اللغة وسط القصر؟؟؟؟؟؟؟
أرون : خليوني نقتلهااا
إسحاق : لا هادي موتها غاتكون على يدي كيفاش جاتها هاد الجرأة باش تطاول على واحد
من عائلة روتشيلد ... هي كاتشوف غير أرسلان لي غايخرج من تما شنو واش كدب و جابها
ليهم بيديه باش يديرو فيها مابغاو؟؟؟ اما سي أصلان بالو غير مع أرسلان و فالشك
ديالو الغالط فيه لي غايتسبب فتوتر العلاقة بينو و بين ارسلان .. وقفو بهضرتو
سي أصلان : أرسلان وقف .. وقف أرسلان فبلاصتو و باقي عاقد حجبانو
أرسلان : نعام؟
سي أصلان : رجع نهضر معاك ... رجع أرسلان لجهة جدو
مالك : ( بصوت منخفض بلا مايشوف فيها ) غير سكتي و ماتهضريش
ريماس : الصمت ... تقابل مع جدو لي كان ملاحظ بلي أرسلان ماعاجبوش الحال .. حط
يديه على كتفو و نطق
سي أصلان : درت غلط و شكيت فيك ولكن واش غاتقلق من جدك على ود هادشي؟
أرسلان : لا
سي أصلان : الأحداث لي وقعو مؤخرا خلاوني نشك فكلشي ولكن عمرني شكيت فقدراتك و
الحوايج لي خلاوني نفضل نقولها لرجال باش يجيبوها حيت ظنيت بلي غاتكون طحتي
فشباكها بحال هاد ل ( خنزر فأسوار ) ... ولكن ثبتي لي العكس فاش جبتيها و زدتي
أكدتي لي بلي ماكايناش شي حاجة لي تقدر تبدلك ولا تهزك
أرسلان : ماتبدلتش ولكن كايبقا الشك ديالك فيا حاجة لي ماغانتقبلهاش بسهولة ا جدي
سي أصلان : واخا ماشي مشكل غانديرو حد لهاد المشكل دابا ... غابريال عيط لدوك جوج
غابريال : واخا .. خرج غابريال من ديك الصالة باش يعيط لواحد 2 اشخاص دازو 10
دقائق و رجع دخل للصالة و موراه 2 اشخاص باين فيهم من رجال سي أصلان
سي أصلان : قربو لهنا ... مشاو قربو ليه
أرسلان : همم باقيين جوج حيين
سي أصلان : كنت عارف نتا لي قتلتي لي كانو مراقبينك نتا و خوك
أرسلان : حاجة طبيعية .. انا ماشي دري صغير باش تحطو عليا الرقابة ... جبد سي
أصلان الفردي ديالو و تيرا فدوك جوج لي قدامو
سي أصلان : ها حنا حطينا حد لهادشي لي غايخلق مشكل بيني و بينك ... ندوزو دابا
لديك المغربية
أرسلان : مالها؟
سي أصلان : اليوم خاصها تموت يا غاتموت على يديك يا على واحد اخر من العائلة
أرسلان : ماغاتموت على يد حد ... يتبع
البارت 228 من قصة :
♚♔ العميل صهيوني و الجاسوسة المغربية
♔♚
بقلم : ♚♔ كاپيطوسة المغربية ♔♚
♚ الفصل الثاني ♚
سي أصلان : ماغاتموتش؟؟
إليان ( إبن داوود ) : قلت لك بلي راه بينو و بينها شي حاجة
ولكن ماتيقتينيش
أرسلان : بحالك بحال داوود .. ماقلتش ماغاتموتش قلت ماغايقتلها
حد
سي إصلان : علاش؟؟؟؟ مابغيتش نعاود نغلط فالتفكير كانتمنى
تعطيني سبب على هاد الهضرة
أرسلان : سواء قتلتها سواء لا غاتموت غاتموت
سي أصلان : زيد وضح لي كتر .. جاوبو بكل برود
أرسلان : مورغان سيفط لها خدامة قدرات تحقن لها فيروس الفاريولا
فالدم ديالها و بدات كاتطورو بالعينات لي كانت كاتحطهم لها فالماكلة .. بقات
كاتشوف فيهم بصدمة كيفاش حقنو لها داك الفيروس؟؟؟ واش هي دابا غاتموت بداك
الفيروس؟؟؟؟؟ داك الفيروس لي كان مصابين بيه النص فالسودان .. داك الفيروس لي كانت
شحال و هي كاتسيفط مساعدات للمرضى ديالو جات الدورة و ها هي تصابت بيه .. أسوار غير
سمع بلي تصابت بالفيروس ناض من بلاصتو و عاود رجعو سي إيتان خنزر فيه
سي أصلان : كمل .. حنا اش دخلنا فهادشي؟
أرسلان : المرض تطور و مابقاش لها بزاف ديال الوقت معانا ..
شهور .. اسابيع ... ايام .. شكون عرف
سي أصلان : امم و نتا متأكد من هادشي؟
أرسلان : مالك
مالك : واخا ا ميستر أرسلان ... قرب لعندو و عطاه شي تحاليل
كانو داروهم لها الاطباء لي كان داهم للمغرب .. شدهم سي أصلان و بدا كايقرا فأعراض
المرض او بالأحرى الأمراض لي تحقنو لها حيت مورغان ماحقنش لها فيروس واحد بل 2
فيروسات من اخطر الفيروسات .. قرا الأعراض ديال دوك الأمراض و بدات كاتظهر ابتسامة
الشر على محياه ، حط الوراق فالجنب و ضار لعند أرسلان
سي أصلان : فهاد الحالة ماعندها فين تمشي بغيت نشوفها قدامي
كاتتعدب .. قدااامي كاتموت بشوية بشوية
غابريال : ولكن ا ب
سي أصلان : قلت هضرتي و مانبغيييهاش تعاود ولا يناقشني فيها شي
واحد .. هدا لي ضرباتو راه حفييدي و ولدي ماغانخليهاش تموت موتة وحدة و تتهنا ..
بغيتها تموت 1000 موتة فالنهار قدام عيني ولكن هادشي ماغايساليش هنا ، قلتي
الخدامة كانت كاطور لها المرض عن طريق داكشي لي كانت كاتاكل ياك؟
أرسلان : حتى هما تحقنو بنفس الفيروس ديال الفاريولا
سي أصلان : و الثاني؟؟
أرسلان : مورغان كان مركز عليها هي ماشي على خوتها داكشي لاش
هما تحقنو بفيروس واحد على أي ... حتى هما تطور لهم المرض ديالهم ... حسات بسطل
ديال الما بارد تخوا عليها حتى خوتها مانجاوش من هادشي حتى خوتها مازكلوهمش
ماقدراتش تزيد تصبر حيت لي كان مصبرها هما خوتها و بس .. نطقات بالعبرية
ريماس : ( بغضب ) فين خووتي؟؟؟؟؟؟ كيفاش قدرتو ديرو فيهم هادشي
يا عديمي الضميييير ... مع سالاتها كلشي هز السلاح لجهتها
إسحاق : تزيدي كلمة نسيفطك قبل الوقت
سي أصلان : بان ليا زربانة على راسك
أرسلان : مالك خرجها
ريماس : فين غانخرج الغداااار؟؟؟؟ قلتي لي خوتي غاتجيبهم ليا ..
دابا كاتقولو بلي خوتي حقنتوهم؟؟؟؟؟ غاااااااانقتلكم ا أرسلان غا نقتلكم كانقسم لك
غا نشرب من دمكم الحقييير ... جرها مالك و هي باقا كاتسب فيه ، خرجها لبرا و سد
الباب
سي أصلان : ( هاز حاجب ) كيفاش كاتهضر معاك بهاد الطريقة؟
إليان : كلشي واضح ا جدي
أرسلان : لسانها سليط ، المرة الجاية لي غاتتدخل فيها بيني و
بين جدي غانتبعك لداوود
سي أصلان : على هاد الحساب لسانها خاص يتقطع
أرسلان : مابقاش بزاف و غاتتقطع معاه
سي أصلان : بما انك ثبتي لي راسك مرة اخرى ... غانطلب منك حاجة
اخيرة
أرسلان : خوتها دابا نجيبهم
سي أصلان : ( بإبتسامة شر ) كاتفهمني مزيان .. بغيتها تموت نهار
على نهار و هي كاتشوف خوتها كايموتو قدامها ... يتبع
البارت 229 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
أرسلان : كلفتهم يجيبوهم
سي أصلان : غانجيبو دكتور ديال العائلة باش يتحقق فين وصل المرض
ديالها باش نعرف شحال غاتبقا عايشة
أرسلان : نقدرو نقتلوها عادي و نتهناو ولا لا ا غابريال
سي أصلان : ( بصرامة ) مانبغيش نسمع بلي شي واحد خالف هضرتي و
قتلها مفهووووم؟ باغيها تتعدب و تموت بشوية بشوية .. تتمنى الموت و ماتلقاهاش
أرسلان : لي بغيتي ا جدي
أسوار : و فين غاتعيش؟؟؟؟
إسحاق : هههه اكيد ماشي فالقصر شوفو لها شي كوخ خارج القصر
سي أصلان : لا اجي جلس بلاصتي و قرر فبلاصتي اش بان لك؟؟ شفتكم
مابقيتوش تحتارمو باغيين نرجع معاكم ليام زمان؟؟؟
أرون : فين غاتبقا؟؟ كانظن ايلا خليناها خارج القصر تقدر تهرب
غابريال : ماعندها فين تهرب فين غاتهرب و الجزيرة خاوية فيها
غير الشجر و الحيونات؟؟
سي إيتان : فنظري تجلس فالقصر باش تبقا تحت عينينا
إليان : كاضحكو لا؟ ايلا جلسات فالقصر غاينوضو المشاكل و يقدر
يكون مرضها معدي يعني ماغاتمشي حتى تجر كلشي معاها
أسوار : ( بعصبية ) شكون قالك مرضها معدي؟؟؟ المرض ديالها
ماكايعاديش و فالأوق و الاخير القرارات كايبقاو ديال جدي و أرسلان
غابريال : ايلا نوضات المشاكل قرطاسة وحدة كافية ليها و لخوتها
سي أصلان : واقيلا راني هضرت و قلت ماغايقتلها حد من غير لا
سمعتو مني شي كلمة خرا بالنسبة لفين غاتجلس غاتبقا فالقصر كيما قال إيتان و أسوار
إليان : ( بصوت غير مسموع ) عطيوها جناح و هنيو راسكم
أرسلان : غاتبقا فالغرفة لي فالطابق ديالي انا وجدي باش تبقا
قدام عينينا
سي أصلان : هدا اخر قرار و ممنوع تخرج منها
إليان : كملات الباهية
أرسلان : قلتي شي حاجة؟
إليان : علاش واش نقدر نقول شي حاجة و نتوما كاينين
سي أصلان : تأكدتي بلي مرضها ماغايأثرش علينا؟؟؟
أرسلان : كلشي كاينين فنتائج التحاليل
سي أصلان : يعني حلينا هاد المشكل .. باقي شي واحد عندو شي
اعتراض؟
إليان : وي ان
سي أصلان : مزيان اذا سالينا و سدينا هاد الموضوع لي عندو شي
شغل يمشي يقضيه ما عدا أرسلان و أسوار ... خرجو من تما و خلاوه معاهم
أسوار : جدي كاين فاش غاتهضر معانا؟
سي أصلان : نتا بعدا فهاد المدة مانبغيش نشوفك كادور بيها هضرت
معاك ديك المرة و عاودت هضرت معاك البارح
أسوار : ماكاندورش بيها و ماعندي علاش ندور بيها
سي أصلان : قضية رجال لي سيفطتيهم يحضيوها عند بالك ماعرفتهاش؟
و داك لي خدمتيه عندها شيفور يسحابلك تا هو ماعرفتوش؟؟؟ راه كلشي كايوصلني و
كانميك ماتخلينيش نفقد فيك ثقتي ا أسوار
أسوار : فهمت
سي أصلان : بالنسبة للرحلة ديال أمريكا لغيتها ماشي هدا وقتها
هادشي ماكايعنيش ديرو لي بغيتو .. عيني غاتبقا عليكم بجوج بيكم
أرسلان : ماعنديش مشكل فهادشي
أسوار : واخا
سي أصلان : نتا شفتك ماعاطيش الوقت لمراتك؟؟
أرسلان : دابا نمشي لعندها
سي أصلان : و ايمتا ناوي تطلعها للجناح ديالك؟؟ غاتبقاو هاكا كل
واحد فقنت
أرسلان : ( بجدية ) جدي هاد الموضوع هضرت لك عليه مسبقا ...
ماكانبغيش شي حد يدخل للجناح ديالي
سي أصلان : ايوا و شنو؟ ناوي تخليها بحال العشيقة؟؟
أرسلان : حقوقها غانعطيهم ليها
سي أصلان : حالكم مابقاش عاجبني على العموم نتمنى ماديروش شي
حاجة غالطة ... يتبع
و ها هو خرجها من المشكل مؤقتا .. قلب القفة على جدو و خلاه يظن
بلي هو لي غالط بلا مايحتاج يكدب عليه ولا يتحداه و فنفس الوقت خلا جدو هو لي يقرر
باش يخليها فالقصر و يأكد عليهم باش مايقتلها حد ..
يتبع
البارت 230 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
سي أصلان : باقي عندي واحد السؤال مزال مالقيت ليه الجواب
أسوار : شنو هو ا جدي؟
سي أصلان : عائلتها لي غبرات بشكل مفاجئ ماعرفتش شكون مم مور هادشي ولكن شكيت
فواحد الشخص ... شاف أسوار فأرسلان و نطق
أسوار : يقدر يكون مورغان هو لي من مور هادشي
سي أصلان : داكشي فاش شكيت و لي زاد شككني فيه هو ولا كايتصرف من مور ضهري
أسوار : كلشي ممكن ا جدي
سي أصلان : أرسلان شنو رأيك فهادشي يكون مورغان هو لي سبقني ليهم و قتلهم؟
أرسلان : ( بإبتسامة ) نقدر نكون انا
سي أصلان : ( كايضحك ) ولات عندك روح الدعابة ا ولدي
أرسلان : ولا فيا كلشي ا جدي .. ناض من تما و باس لجدو يديه
سي أصلان : صافي غادي؟
أرسلان : عندي شي غرض نقضيه ضروري
سي أصلان : واخا و ماتنساوش تعيطو على رجالنا يحبسو البحث مدام شدهم مورغان هداك
حسابي معاه هو اللخر
أرسلان : واخا ا جدي
أسوار : جدي نخليك حتى انا
سي أصلان : ماتنساش اش قلت لك ماتعاودش دور بيها
أسوار : كلامك فوق الراس ... باس ليه يديه و تبع أرسلان ... خرجو لقاو ريماس
غايخرج لها عقلها و محمقة مالك معاها بالأسئلة و هو ساكت بسبب التحذير
أسوار : ( بنظرات عاشقة ) ريماس صافا
أرسلان : سير عند مرتك راه كاتسناك واقيلا عاد هضر معاك
أسوار : و مرتك نتا ماغاتمشيش عندها؟؟ ... خنزرات فأرسلان و عاودات خنزرات فأسوار
دورات وجهها لعند مالك و هزات صبعها فوجهو كتهديد
ريماس : ( بنبرة تهديد ) عرفتي و نعرف بلي قتلتو خوتي غانشعل فيكم العافية واحد
بواحد .. شدها أرسلان من داك الصبع و جرها تحت نظرات أسوار و مالك
أسوار : مالك مال يديك؟
مالك : ماشي شي حاجة ا ميستر أسوار جرح بسيط
أسوار : أبراهام مابانش ليا هاد النهار؟
مالك : عندو شي غرض كلفو بيه ميستر أرسلان
أسوار : امم اوك
♚ وصلو للطابق الفوقاني كانت هادئة و ماغوتاتش ماشي حيت دارت عقلها .. ولكن حيت كانت
كاتحفض القنوت ديال القصر باش تهرب من بعد
أرسلان : غير شوفي قدامك راكي ماخارجاش من هنا إلا لاكانو غاديين بيك للقبر
ريماس : ( بغضب ) القبر هو لي غانخشيكم فيه كلكم و نشعل فيكم العافية
أرسلان : همم حاقدة بزاف
ريماس : و كتر من القياس .. فين غادي؟
أرسلان : الصمت ... طلعو للطابق الفوقاني كاع و فداك الطابق كاين غير 2 أجنحة و
غرفة ... جناح الباب ديالو فالأسود و الأبيض و هدا ديال سي أصلان و فالجهة التانية
كاين جناح ديال أرسلان الباب ديالو فالأسود و الذهبي و الوسط كاينا غرفة كبيرة
الباب ديالها بيضة و تما فين غاتكون ريماس .. حل الباب و ما أن شافت اش كاين لداخل
حتى حلات عينيها على وسعهم و تنطرات منو مشات كاتجري لجهتهم كانو بجوجهم ناعسين
بفعل المخدر لي دار لهم أبراهام و مالك ... يتبع
البارت 231 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
مشات لجهتهم بدات كاتبوس فيهم كانو مبدلين حوايجهم و مالابسينش حوايج سبيطار
ريماس : علاش مافاقوش؟؟؟؟ اش درتي لهم؟؟؟؟
أرسلان : ساعات و غايفيقو ... مشات لجهتو
ريماس : و علاش خدرتيهم؟؟؟؟ علاش اصلا جبتينا لهنا؟؟؟ باغي تشوفني قدامك كانموت؟
باغي تشوفني فأسوء الحالات ياك؟؟ .. هداك النهار هو لي ماتحلمش بيه حيت نمووت و
مانخليكش تفرح بيه ... شاف فيها مطولا و خرج بلا مايجاوبها توجه للتحت و بالضبط
لغرفة مرتو ولكن فالطريق تصادف مع إليان
إليان : ( بحقد ) أرسلان
أرسلان : ( ببرود ) ولد عمي العزيز
إليان : فرحان دابا ياك؟ اووو بطبيعة الحال غاتكون فرحان و حبيبة القلب ولات فجنبك
أرسلان : ( بهدوء ) كاتفهمني ا ولد العم
إليان : غادي تندم بزااااف
أرسلان : واخا داوود غير مربيك و كاتعتابر ولد خوه ولكن نفس الحقد و الصفات وارثهم
عليه عادي جدا حاجة متوقعة
إليان : شوفو شكون كايهضر مدخل عشيقة حتى لوسط الدار لي فيها مراتو نيت ( كرز على
سنانو ) ماكاتستاهلهاااش
أرسلان : ( قرب لودنيه و همس ) كنت عارف عينيك عليها
إليان : حقيير
أرسلان : نعتابرها مجاملة؟!
إليان : قريب تكتاشف حقيقتك قدام جدي و انا لي غانكشفها
أرسلان : كاين شي حاجة مخبية باش تكشفها؟!
إليان : شيرا ماكاتبغييييكش فهمها شيرا كاتبغيني
أرسلان : هاد الهضرة قولها لجدي ماشي ليا .. مشا و خلاه موراه كايتوعد لو
بالإنتقام حيت تزوج بالبنت لي كايبغيها و كاتبغيه ولكن ماكانش قادر يقولها حيت
ترباو بجوج واخا ماشي خوت و غير تهناو حتى هو من عائلة روتشيلد بالحق الأب و الأم
ديالو ماتو و هو صغير داكشي لاش داوود تكلف بتربيتو ... حل الباب بلا مايدقها لقاها
جالسة مع الأم ديالها و بنت عمو وحداخرا غير شافوه ناضو خارجين بالزربة من تما اما
هي بقات جالسة و بحالا جالسة على شوك داكشي لاش عاودات ناضت من بلاصتها و قلبها
غايسكت بالخلعة منو
شيرا : ( حانية راسها ) ا ا ارسلان
أرسلان : جلسي ماعندك علاش توقفي
شيرا : اه واخا لي بغيتي
أرسلان : صافا؟!
شيرا : ( كاتلعب فيديها بالتوتر ) صافا ميرسي
أرسلان : على العموم جيت غير باش نعلمك قولي لمك و للخدامات يعاونوك توجدي راسك
هاد الليلة ... هزات فيه راسها بصدمة و دموع تجمعو فعينيها خنقاتها البكية و
ماقدراتش تهضر
شيرا : ( بصوت مخنوق ) واخا
أرسلان : مزيان ... خرج من تما و خلاها غاتموت بالبكا الشخص لي كانت باغاه يكون
راجلها ماقدراتش تتزوج بيه و الشخص لي كانت كاتتمنى باش مايجيش النهار لي تزوج بيه
و من نهار نهارها غير سميتها كاتخلعو هو نفسو لي غاتتزوج بيه ... فجهة خرا كان
واقف أسوار حدا البيت ديال ريماس و مدابز مع راسو واش يدخل ولا مايدخلش ... توحش
يشوفها و توحش بريق عينيها و توحشها كلها واخا كاتعتابر بالنسبة ليه وردة فوق جبل
عالي و داك الجبل كلو عقبات و اشواك و عقبات ولكن اش عندو مايدير الحب ما يشاور
دارها فيد الله و لي بغا يوقع يوقع حل الباب و دخل لقاها كاطل من داك شرجم كاتشوف
واش كاين شي فرصة ولا والو غير تحلات الباب قلبات الدورة عندو بالزربة
ريماس : هدا نتا اش كادير هنا؟؟؟ ... يتبع
·
البارت 232 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
·
ريماس : جيتي حتى نتا تتشفا ياك؟؟ ... قرب لعندها و جلس فوق ناموسية فين ناعسين
خوتها دوز يديه عليهم بحنان و نطق
أسوار : قريت نتائج التحاليل و قدرت نصورهم عندي غادي نوريهم للطاقم الطبي الخاص
بالعائلة و يعاودو يديرو لكم تحاليل باش يتأكدو من مراحل المرض
ريماس : و نتا اش غاتستفاد من هادشي؟؟؟ حاجة باينا مادايرش هادشي في سبيل الله
ياك؟؟؟
أسوار : ( كايشوف فخوتها ) خوتك باقا وردتهم عاد كاتفتح فالدنيا مابغيتهمش يمشيو
ضحية فهادشي .. مابغيتكش تموتي و غاندير جهدي باش تعالجي فأسرع وقت .. شافت فخوتها
و عاودات شافت فيه و ضحكات بإستهزاء
ريماس : واش عارف المرض لي مريضة بيه ولا لا؟ واش فخبارك بلي ماكاينش لي تعالج
منو؟؟؟ كاين دوا كايحد المرض و خاص الانسان يتعايش معاه ا اسوار ولكن مستحيل
يتعالج منو لحد الساعة ماكاينش لي نجا منو واش كاتعرف شنو هي غير العام لي فات
ماتو فيه 70% فالسودان و الباقي باقيين لحد الساعة مراض بيه و جاي نتا بكل وجه حمر
باغي تستغبيني بجملة دابا تشافاي ا ريماس .. خوتي غانولي نشوفهم كايموتو قدامي
نهار على نهار ا اسوار و انا غانولي نموت نهار على نهار و ماقادرة ندير والو حيت
لي عطا الله عطاه كايجيك هادشي ساهل؟
أسوار : غانبقا واقف معاك حتى تعالجي و من هنا لداك الوقت ماكاينش لي غايقيس منك
الشعرة
ريماس : علاش نتا بحال هاكا معايا؟؟؟
أسوار : حيت كانبغيك ا ريماس من اول نهار شفتك فيه
ريماس : واحد يقول باغيك و واحد يقولك كانبغيك و بجوج بيكم يهود صهيون و من الفوق
مزوجين واش كانبان لكم لعبة؟؟؟ واش عند بالكم حيت عندكم النفوذ غادي نخليكم ديرو
مابغيتو .. وقف و ناض لعندها بزربة شد لها فيديها
أسوار : كانقسم لك ا ريماس هادشي ماكانش بيدي جدي و أرسلان هما لي زوجوني انا كنت
باغي نتزوج بيك نتي .. كنت باغي نعيش معاك نتي .. كنت ناوي نتبدل و ندير لي بغيتي
على ودك
سي أصلان : ا تبارك الله على حفيدي العزيز .. علاش طلقتي من يديها زيد زيد كمل ..
غير سمعو صوتو بعدو من بعضياتهم و دارو لجهتو لقاوه واقف حدا الباب كي دار حل
الباب و من ايمتا و هو هنا الله و اعلم
اسوار : جدي؟
سي أصلان : علاش حبستو؟ كمل كمل هادي هي غاتمشي عند مرتك ياك من النهار اللول
خليتي مرتك و جيتي لعند هاد الحقيرة .. بقات كاتشوف فيه ريماس و لأول مرة ياااا
ساااااادة ماتجاوبش شي حد عايرها ولكن علاش يا ترى بقات ساكتة؟ حيت بكل بساطة
ماكاتسكت حتى كايكون الشيطان ديال عقلها خدام كايفصل و يخيط
ريماس : أسوار خرج
سي أصلان : دير بحال خوك و نوض شوف مصالح العائلة بلاصة ماتبقا مقابل لي هادي لي
بقا لها خطوة للقبر .. طلعات فيه و هبطات
ريماس : لا باين نيت انا نيت لي باقا لي غير خطوة للقبر
سي أصلان : قلتي شي حاجة؟؟؟
ريماس : الصمت
أسوار : ماقالت والو ا جدي
سي أصلان : اخر مرة نلقاك عندها هنا كانحذرك ا أسوار
أسوار : واخا ا جدي .. خنزر فيها اصلان و عاود شاف فأسوار
سي أصلان : تبعني .. حتى كان غادي شوية عاود قلب الدورة و شاف لجهة الناموسية
أسوار : واخا
سي أصلان : شكون ناعس تما؟
أسوار : خوت ريماس عاد جابهم أبراهام
سي أصلان : ايمتا؟
أسوار : يلاه واحد الشوية
سي أصلان : مهم تبعني ( شاف فريماس ) مانلقاكش خرجتي من هنا مابغيتش تنجسي ليا
داري ... يتبع
البارت 233 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
ضلام الحال و خوت ريماس مزال ما فاقو اما ريماس خلاوها تما بالجوع نساوها كاع
♚ كان متوجه لغرفة شيرا و مرة اخرى طلاقا بإليان فطريقو و جاي و ماناويش على الخير
حيت وصلو ليه الخبار بلي أرسلان الليلة غايدخل على شيرا و هادشي لي كان باغي هو ..
تم جاي متقصدو ولكن قبل ماينطق سبقو أرسلان
أرسلان : تبغي تشوف مراتي؟!
إليان : ( كارز على سنانو ) غاتندم بزاف سمعتييي
أرسلان : عرفتي دابا اش غاندخل ندير لعندها؟ ( غمزو )
إليان : ماغانخليهاش فيا غانرجعها لك فالقريب العاجل كون اكيد
أرسلان : ماكانظنش حيت ماشي جبان بحالك .. خلاه واقف مصدوم و دخل لعند شيرا .. لي
كانت لابسة شوميز دو نوي و معطرة و مجهزة و جالسة فبلاصتها حانيا راسها غير سمعات
الباب تحلات خفقات قلبها تضاعفو .. تجاوزها و مشا لجهة الفوطويات حط رجليه فوق
طبيلة لي تما و اشار لها بيديه باش تجي .. ناضت من بلاصتها و مشات لعندو
أرسلان : مالك كاترعدي!!
شيرا : ( حانية راسها ) ههه ل ل لا ... رجع راسو اللور و بقا كايشوف فالسقف بتاسم
و كأنه تفكر شي حاجة
أرسلان : هنا فين كاين الفرق بينكم و بينها
شيرا : ( بصوت هادئ ) مافهمتش
أرسلان : ماعندك علاش تفهمي ( رجع تقاد فالجلسة ) همم بان ليا كاتبغيه
شيرا : ( بتوتر ) مافهمتش
أرسلان : سبقيني هاني جاي
شيرا : ( بتوتر ) فين؟
أرسلان : فين فنظرك؟! طلقي راسك
شيرا : واخا
♔ باقا كادور فالبيت غادا جاية فيه .. قلباتو و شقلباتو لعل و عسى تلقا شي حاجة لي
تقدر تفيدها فأي حاجة ولكن ماكان والو .. مخ مخها وقف و تفكيرها تبلوكا ماعارفاش
أرسلان فاش كايفكر داكشي لاش ماقادراش دير شي خطوة فالوقت الحالي .. واش فعلا ناوي
يعاونها؟؟؟ ولا غير كايكدب .. واش اسوار يقدر يعالج لها خوتها؟؟ ولا ماغايقدرش
قررات تقطع حبل تفكيرها و تمشي تنعس على الاقل تحبس غير هاد الجوع لي كاتحس بيه دابا
.. تجبدات حدا خوتها و ما ان حطات راسها على المخدة حتى غفات.
_ أبراهام : واش لقيتو العلاج؟؟؟
الدكتور : دايرين جهدنا .. و كيف قلت لميستر أرسلان فاش كنا فالمغرب المرض ولا
فمراحل متطورة و ولا كاينتاشر بواحد السرعة هائلة
أبراهام : هي لاطلقتي راسك و لقيتي شي حل فهاد اليامات قبل ماتوقع لكم شي حاجة و
يتبعك ليهم
الدكتور : غادي نعطيكم واحد الدوا باش تحدو لها من تطور المرض و باش نقدر ناخد
الوقت لي نلقا فيه علاج ولكن غايبقا واحد المشكل
أبراهام : اينا مشكل؟؟؟
الدكتور : سبق لي و شرحت لميستر أرسلان بلي هي ماشي بحال خوتها حيت هي عندها 2
امراض عكس خوتها
أبراهام : وي عاقل و شنو الحل للمرض الثاني؟؟
الدكتور : ************
أبراهام : وي فهمت كانظن حتى ميستر أرسلان عارف هادشي .. ركز على اللول حيت هداك
لي حاليا عندنا المشكل فيه
الدكتور : عارف لي كاين هادي هي خدمتي
أبراهام : شحال غايخصك ديال الوقت باش تقدر تلقا العلاج؟؟؟
الدكتور : ماعرفتش مي هادشي غاياخد شهور
أبراهام : لا بان ليا نخلي ميستر أرسلان هو لي يجي نتي و يوريك الشهور من السنين
ياك؟
الدكتور : هدا هو جهدي
أبراهام : يعني نعيطو لميستر أرسلان دابا نيت
الدكتور : أبراهام فهمني راك كاطلب مني شي حاجة مستحيلة مايمكنش نلقا دوا فأيام
قليلة
أبراهام : ضبر راسك هادشي ماشي شغلي انا
♔ بدات كاتحل عينيها على يدين كايفيقوها كانو خوتها
ريناد : ختيتو فقتي
فادي : ختي ماتكدبيش علينا شنو واقع؟؟؟؟
ريناد : ختي شكون دوك رجال؟
فادي : علاش كانو هازين السلاح؟
ريناد : و علاش مابقيناش عند صديقك؟؟ ... يتبع
البارت 234 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
مع حلات عينيها مزال حتى ما غسلات وجهها بداو فالأسئلة تدهشرات ماعرفات واش تقول
لهم الحقيقة لي غايعرفوها أجلا ام عاجلا ولا تخبع و تطمأنهم .. قلباتها ضحك معاهم
باش ماتبينش لهم
ريماس : بشوية مالنا على هاد لونكيط على الصباح
فادي : ولينا فوقما نفيقو كانلقاو راسنا فبلاصة مرة فالطبيب مرة فدار خرا مرة هنا
ختي مابقيت فاهم والو
ريناد : ختي حنا خوتك ماتخبيش علينا
ريماس : ( بإبتسامة ) ماكانخبيش عليكم كاين واحد الغرص صغير غانساليه و نمشيو
فادي : اينا غرض ا ختي ووحنا ماجايبينش معانا حتى حوايجنا؟؟؟
ريماس : اوك غانقولكم الصراحة ولكن ماتخلعوش
فادي : هادشي لي بغينا
ريماس : فالصراحة وقعو لي مشاكل مع شي منافسين فالشركة و الوضع ولا خطر بزاف لدرجة
وصل للقتل
ريناد : اهاه
ريماس : داكشي لاش صديقي قرر يعاونا فاش كنا فالكلينيك باش مايوصلوش لينا
فادي : و ايمتا غايسالي هادشي؟؟
ريماس : ماعرفتش ولكن قريب
ريناد : و علاش مابقيناش فدارو؟؟؟
ريماس : حيت دابا جابنا لقصر عائلتو باش نكونو فأمان كتر
ريناد : خاصنا نتعرفو عليهم و نشكروهم ياك ا ختي
ريماس : وي ولكن ماشي دابا المهم حاليا ماتخرجوش من هاد البيت حتى نقولها لمم
واخا؟
ريناد : واخا ولكن فيا الجوع ا ختي بزااااف ... تحل الباب و تمشا جوج خطوات غير
سمعات الخطاوي عرفاتو هو
ريناد : ( بفرحة ) ها هو جا صديقك ا ختي ... مشا فادي لعندو باش يسلم عليه
فادي : لاباس عليك؟ ... سلم عليه ارسلان و عاود قلب عينو لجهة ريماس
أرسلان : تبعيني
ريماس : ماتابعاكش بغيتيني هضر معايا هنا ( شافت فخوتها لي كايشوفو فيها بإستغراب
) ههه بغيت نقولك هضر معايا غير هنا حسن
أرسلان : كانتسناك على برا .. خرج من تما و جبد طيلي ديالو سيفط ميساج لمالك و
عاود رجعو لبلاصتو و ما هي الا دقائق حتى كانت خرجات من البيت و بدات تخنزر فيه
ريماس : نعام؟
أرسلان : غاتقادي داك الفم لا؟! ... جا لعندهم مالك طاير
مالك : ياس ميستر أرسلان
أرسلان : ديهم يفطرو ماشي قدام العائلة
مالك : حاضر ميستر أرسلان .. دخل لعندهم مالك و بعد لحظات تم خارج هو وياهم ...
رجعات للبيت و تبعها
ريماس : فين غادي؟؟؟
أرسلان : جديدة عندك هاد فين غادي راني فداري .. سد الباب
ريماس : و علاش سديتي الباب؟؟؟
أرسلان : خايفة مني؟!
ريماس : و علاش غانخاف؟ .. سترجعات القرارات لي كانت خداتهم فاليخت ديال انها
غاتسيرو و تمشي معاه فالخط و نطقات
ريماس : لا ماواصلاش لدرجة الخوف .. مشا جلس فوق الناموسية
أرسلان : شحال فعمرك دابا
ريماس : ( بلباقة ) البنات ماخصكش تسولهم على العمر ا أرسلان
أرسلان : غاتكوني فالواحد و عشرين خسارة غاتموتي و نتي فهاد العمر هاد الجمال
غايضيع غير هكاك
ريماس : خسارة ماعندوش لي غايلقا ليه العلاج
أرسلان : ( ببرود ) ماكايجيش معاك داك القناع حيديه و خليك عادية كيما عرفتك
ريماس : بطبيعة الحال غاتولف بنادم كاموني مايصلاحش تهضر معاه بلباقة
أرسلان : قلت خليك عادية ماشي تزيدي تطولي لسانك
ريماس : راني عادية
أرسلان : جلسي باغي نهضر معاك
ريماس : غير هضر هاكا مرتاحة
أرسلان : الموضوع كايهم خوتك ولكن بان ليا ماباغاش تعرفي
ريماس : هاني جلست ... يتبع
البارت 235 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
تأفأفات و مشات لجهتو جلسات
ريماس : أنبك ضميرك و بغيتي تصلح الأمور؟
أرسلان : فاش تمشي للقبر وصلي سلامي لعزرائيل ديالكم ... بغا ينوض من تما و بدون
قصد شداتو من يديه باش تحبسو
ريماس : لا لا صافي مابقيتش غا نهضر هاني ساكتة .. بقا كايشوف فيديها لي شادين
فيديه بتاسم ابتسامة جانبية و زير لها على يديها حتى لاقا لها العضومة ديال
صبعانها السبب الأول حيت حس بواحد الاحساس زوين مس قلبو و السبب الثاني باش تبقا
تزم فمها لي شحال مابقات غا تجيبها فراسها بسبابو .. خصرات سيفتها كتعبير عن الألم
أرسلان : طلقيها
ريماس : فنفسها ( حيوان )
أرسلان : كبريائك مايسمحش لك؟!
ريماس : ( مكمشة سيفتها ) ماعندي علاش نغوت .. بقات كاتجر لعندها يديها حيت فعلا
ضراتها الشدة
أرسلان : تقصحتي؟
ريماس : لا
أرسلان : و دابا ... زاد زير على يديها حتى ولات كاتحس بشي عضم غايخرج من صبعانها
زادت خصرات سيفتها
ريماس : ( بإبتسامة مصطنعة ) لا
أرسلان : و دابا؟! ... زاد زير لها على يديها و بقا كايحرك دوك العضومة غاتكونو
كاتعرفو هاد الحركة مزيان .. غمضات عينيها و نطقات بصعوبة
ريماس : ل لا
أرسلان : متأكدة؟!
ريماس : ( بنظرات تحدي ) وي متأكدة
أرسلان : شوفي و كان ... زاد زير على يديها كتر من اللول حتى زيرات على ليزار لي
فوق الناموسية بقوة الحريق و مع ذلك عاودات شافت فيه بنفس النظرات و نطقات
ريماس : لااا ... طلق يديها و بقا كايشوف فيها بنظرات فشي شكل مع ابتسامة شبح (
ابتسامة شبح يعني شبه ابتسامة مابايناش بزاف ) .. اما هي غير طلق من يديها بدات
كاتحاول طلق صبعانها لي طواهم بداك تزيار تا مابقات تحس بيهم
أرسلان : ( بإبتسامة شبح ) عجباتني عزة النفس لي فيك
ريماس : ( خنزرات فيه ) ... عاود مشا جلس حداها و نطق
أرسلان : دابا نقدرو نبداو فموضوعنا
ريماس : واخا
أرسلان : خوتك غايتحد المرض ديالهم فشهور و ماغايموتوش
ريماس : و حاجة طبيعية غاطلب المقابل
أرسلان : ( بإبتسامة ) ماشي حقير حتى لديك الدرجة
ريماس : شنو زعما كنتي السبب فالمرض ديالنا و دابا بغيتي تصلح خطأك؟ يعني يا كاين
المقابل يا حسيتي بتأنيب الضمير
أرسلان : ماكانندمش على شي حاجة درتها
ريماس : الصمت
أرسلان : غاتعالجي معاهم و كل حاجة و السعر ديالها
ريماس : هاااا لي قلنا كنت عارفاااها كنت عاااارفاك غادي طلب شي حاجة سافلة بحالك
ال ..( حبسات هضرتها فاش تفكرات بلي خاصها تسايرو ) واخا مرحبا و شنو المطلوب؟
أرسلان : ( ببرود ) المطلوب تسدي فمك و ماباقيش نسمع حسك حيت المرة الجاية لي
غانعاود نشوف هاد الاسلوب ديال الهضرة غايكون النهار اللخر فحياتك بمعنى اخر تبقاي
توزني هضرتك عاد نطقيها
ريماس : واخا و شنو اخر
أرسلان : ديري عقلك فراسك و ماتحاوليش تهربي .. فكلا الحالتين غاتبقاي فالقصر
ريماس : واخا باقا شي حاجة خرا؟
أرسلان : ( بإبتسامة خبيثة ) فاش نعيط لك باش تبدلي لي الفاصمة ماتتعطليش
ريماس : هنا ماشي طلبتي جوج طلبات؟؟؟
أرسلان : و شنو الفرق؟!
ريماس : باقيين شي اوامر خرا سيادة حفيد عائلة روتشيلد؟
أرسلان : ( ببرود ) هادو شروط
ريماس : قابلة
أرسلان : شوية و غايطلعو لك تفطري ... ناض من بلاصتو و بغا يخرج و وقفاتو بهضرتها
ريماس : ايمتا غانبداو؟؟؟
أرسلان : فاش ديري عقلك .. خرج و خلاها جالسة فالبيت دازت نص ساعة جابو لها الفطور
... يتبع
البارت 236 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
فطرات و بقات كاتفكر كي غاتقول لخوتها بلي راهم مراض و خصوصا الاعراض لي غايوليو
يبانو عليهم .. زعما واش تقدر تخليهم يتعالجو بلا ماتقولهم والو باش ماتخلعهم بقات
فكرة كاتديها و فكرة كاتجيبها و فنفس الوقت كاتفكر فشروط أرسلان .. سالات فطورها و
دخلات تدوش على مايجيو خوتها .. دازت نص ساعة خرجات و لبسات نفس الحوايج لقاتهم
جالسين بدات كاتدي و تجيب معاهم فالهضرة باش دوز الوقت و باش ماتخليهمش يحسو
بالقنط حتى وصل الليل
♟ فمكان اخر
***** : واش ماناويش تقولها لهم؟؟؟؟؟
***** : فهميني كي بغيتيني نقولها لهم واش بغيتيهم يقتلونا؟؟؟؟
***** : يعني ماكاتبغينيش كيفاش قادر تشوفني بين يدين غيرك و تسكت و تصبر؟؟؟؟
كيفاش قادر تشوفني مزوجة بشخص وحداخر و تسكت؟؟؟؟
***** : غادي نندمو غير صبري عليا كانتسنا غير تجيني الفرصة و غانرجعك ليا و
نتزوجو
***** : واش عارف اش كاتقول ولا لا؟؟؟؟ واش يسحابلك هو مكلخ تال هاد الدرجة
غايصفيها ليا و انا وياك لاعرفني باقا كانطلاقا معاك واش باغي تواجهو؟؟؟؟ واش عندك
العقل ولا لا
***** : ماكايهمنيش فهمتيني لي كايهمني هو تتفرقي عليه و غادي ندير لي فجهدي باش
نفارقك عليه مايمكنش نخليك ليه مايمكنش
***** : ( بخيبة امل ) فات الفوت على هاد الهضرة ... طلقات من يديه و بدات كاتبعد
إليان : كانبغييييييك ا شيرا ديري فبالك ماغانخليكش ليه و غانشوه لو صورتو قدام
العائلة كاملة غانكويييه فقلبو كيفما كواني
شيرا : ( بحزن ) حتى انا كانبغيك ... ختافات عن الانظار و دموعها شلال كاتشوف حبيب
قلبها قدام عينيها و ماقادراش توصل ليه بينما هو كان الحقد عما ليه عينيه و مابقا
كايشوف والو قدامو من غير خاصو يدمر ولد عمو أرسلان ... صبح صباح جديد عائلة روتشيلد
7:00 كان كلشي فوق الطبلة كايفطر و عند ريماس كانو خوتها باقيين ناعسين اما هي
شيطانها مفيقها أبونور كاتطل من الباب بشوية تشوف واش كاين شي كاميرات فالكولوار
ولات كاتتوقع اي حاجة منهم .. ضربات 9:00 جا مالك لعندهم للبيت باش دا خوتها معاه
على ود الفطور و شي تحاليل غايديروهم لهم بلا مايعيقو .. بقات هي فالبيت حتى جابو
لها الفطور فطرات و واحد القنط جاها ما عالم بيه غير الله قررات تخرج من البيت
واخا تبقا كادور غير فالكولوار المهم ماتبقاش فداك البيت لي حفضاتو شبر بشبر مع
حلات الباب لقاتو قدامها
أرسلان : كنتي خارجة لشي بلاصة!!
ريماس : ( بهدوء ) كنت باغا نشوف خوتي واش جايين
أرسلان : ماتبقايش تكدبي فوجهي الرنين ديال الكدوب لي فصوتك كايدير لي الصداع
ريماس : ( بإبتسامة مصطنعة ) ماكدبتش .. كحزها للجنب و سد الباب و دخل بقا واقف
كايتسناها دور
أرسلان : تبلوكيتي؟! ... دارت لعندو و الاعصاب شاعلين فيها ماكاتحملش هاد البرودة
ديالو فالهضرة و فالتعامل بحالا ماواقع والو بتاسمات بإبتسامة صفراء باش تبتو
ريماس : ماعندي علاش نتبلوكا كاين فاش نعاونك؟
أرسلان : سيري للدوش غاتلقاي علبة الإسعافات جيبيها و اجي
ريماس : ( بإبتسامة صفرا ) شي طلبات خرا؟
أرسلان : ( بادلها نفس ابتسامتها ) حاليا لا ... مشات للدوش جابت علبة الاسعافات و
نعلات النهار لي خلاتو يعرف بلي كاتعرف تسعف و تضمد و تعقم خرجات من الدوش و
توجهات لعندو
ريماس : جلس باش نقدر نضمد لك الجرح
أرسلان : لا
ريماس : تقدر تتحنا غير شوية لعندي باش نقدر نضمد لك؟
أرسلان : لا ... عصبها حتى كانت ناوية تقربلها و عاودات بردااات راسها و جاوبات
ريماس : و كي غاندير نضمد لك؟؟؟
أرسلان : خدمتك هاديك ضبري راسك ... يتبع
البارت 237 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
ريماس : ( بلباقة ) واخا ممكن تحيد القاميجة؟
أرسلان : ماعنديش مانع تحيديها
ريماس : غير مساعدة ايلا بغيتي طبعا و ايلا مابغيتيش ماشي مشكل انا غانتعدب و
نتجبد و نتقاتل باش نحيدها
أرسلان : تجبدي و تعدبي و قاتلي و حيديها
ريماس : فنفسها ( حيوان مايمكنش يزكل شي فرصة باش مايهيننيش فيها تفوووو ولكن غير
تسنا تعالج خوتي غانفدي فيكم القديم و الجديد و علاش اصلا غانتسنا .. غانبداها من
اليوم )
أرسلان : التفكير بزاف غايضرك
ريماس : ههه لا لقيتيني كانفكر فشي وصفة تعالج لك الجرح باش يلتائم دغيا
أرسلان : همم لهاد الدرجة كاتهمك صحتي
ريماس : غير مابغيتكش تبقا مقصح و صافي ... على اساس ماكاينش الاطباء عندهم لي
يعالجوه دغيا
أرسلان : خفي يدك ... بعدات كسدتها عليه و طولات يديها لعندو و بدات كاتفتح فصدايف
القاميجة و كاتحاول ما امكن مايتقاسش اللحم باللحم كاتحلهم بحالا كاتفكك قنبلة ..
حلاتهم و بدات كاتتسناه يحيدها
ريماس : صافي حليتهم
أرسلان : حيديها
ريماس : ياك يدك لاخرا مامضروبش فيها؟؟
أرسلان : قلت حيديها ماشي تحلي صدايف
ريماس : واخا .. تعلات على صبعان رجليها و بدات كاتحيد ليه القميجة و مخلية مسافة
بينها و بينو باش مايتحاكوش .. حيداتها و حلات علبة الاسعافات جبدات داكشي باش
غاتعقم ليه الجرح .. حيدات ليه داكشي القديم عاد بدات تعقم و عاودات ضمدات ليه
الجرح فوقما كاتقوليه يدير شي حاجة كايقولها ديريها نتي عصبها بالمعقول بينما هو
كان مستمتع بتعابير وجهها لي كايتجمعو و يتكمشو و يتعصرو فاش كايقولها لا و مع ذلك
بقات مسايراه و شادة فمها ... و بعد جهااااد و اخيرا سالات تضميد و بدات كاتلوي
ليه الفاصمة على كتفو و مطولة يديها و مبعدة راسها عليه باش مايوقعوش شي تصادمات
كهربائية و ما إلى ذلك و خصوصا هاد الأيام ولاو تصرفاتو واااضحين عندها وضوح الشمس
مع أنه مامعتارفش لراسو او بالأحرى ماكايفكرش فهادشي لي واقع بين العقل و القلب
ولكن طالق اللعب و مخليها فين ما بغات توصل توصل .. لقات صعوبة باش تلوي ليه
الفاصمة مع ديك الپوزيسيون لي دايرا و عاد زيد عليها فرق الطول لي بيناتهم حيت هو
رفض باش يجلس و ماتحناش شوية باش زعما تقدر تلوي ليه الفاصمة بسهولة بل كان مستمتع
بالوضع و الطريقة لي كاضمد ليه بيها .. اما هي بحال شي واحد كايقلي بطاطة ولا
الحوت و مطول يديه باش كايحركهم و مخلي كسدتو بعيدة خايف لا طير عليه الزيت ..
جرها من يديها لعندو حتى تلاصقات معاه الشيئ لي خلا العطر ديال جيل دوش ديالها
يتسلل بين أنفاسو .. حس بملمس يديها الناعم لي كايلامس كتفو .. تعصبات من ديك جرة
و بغات تبعد و عاود رجعها
أرسلان : ماكانعضش ماتخافيش .. هزات عينيها فيه بغضب لقاتو كايشوف فيها بتركيز
شديد مع بنظرات غريبة دخلو لها الشك فراسها و وتروها عاودات رجعات كاتكمل تلوية
ديال الفاصمة بزربة باش تبعد منو و ماتبقاش فهاد الوضع لي مامرتاحاش فيه
أرسلان : سمعت بلي كاتسايريني مؤقتا باش ترجعي للمغرب .. تصدمات فكيفاش عرف و هي
ماقالتها لحد؟؟؟ نو نو ماكايقراش الأفكار غير تهناو ولكن مايخفاش عليه هاد التغيير
لي ولا فتصرفاتها بدون اي سبب مقنع .. حاولات ماتبينش بلي تصدمات
ريماس : هادو كايبقاو أموري الشخصية و شؤوني الخاصة لي مامنحق حتى واحد يتدخل فيهم
أرسلان : نعتابرو إعتراف؟! على العموم ماتجاوبيش ولكن هاد القصر مابقات عندك خرجة
منو قد ما دخلتي هاد القضية لراسك بكري قد ما كان حسن لك ... سالات تضميد و بعدات
شوية و نطقات بهدوء
ريماس : الوقت لي غايورينا واش غانخرج ولا غانبقا
أرسلان : ماتكونيش متأكدة تال هاد الدرجة باش ماتأثرش عليك الصدمة ... يتبع
البارت 238 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
ريماس : صافي ساليت
أرسلان : و القاميجة شكون غايرجعها لبلاصتها!!
ريماس : ياك قلتي لي غير نبدل لك الفاصمة؟؟؟ اووووف واخا ... هزات القاميجة
بالنطير و رجعات لجهتو مخنزرة و ماعاجبها حال ماكرهاتش تلبس ليه الشوك ولا الجمر
.. بدات كاتشوف فهاد الكم الهائل ديال الوشام لي مغطي ليه صدرو و يديه ماحملات داك
الوشام ما قبلاتو و خصوووصا فاش شافتو واشم النجمة السداسية جهة قلبو صافي هنا
كملات الباهية عندها .. عاودات حولات نظرها لكتف التاني بانت لها الندبة ديال
طورنوفيس لي كانت خشاتو ليه فكتفو ديك الليلة ... بتاسمات بحالا كاتتشفا فيه لحد
الساعة لحمو كامل فيه غير 2 ندبات و دياالمن هاد الندبات و شكون كان موراهم؟ لالة
ريماس مولاتهم غير مانعرف كيفاش مزال حية و صافي ... شوية تقرصات حسات براسها
بحالا ضربها الضو فاش هزات عينيها و لقاتو كايشوف فيها بشي شوفات غير الله يحضر
السلامة و صافي .. بدات كاتحاول تزرب باش تلبسو القاميجة دغيا و تبعد ولكن
ماخلاهاش تكمل حيت شدها من دراعها بدون سبب و قربها لعندو شوية دخل أسوار لي كان
مراقب هاد المشهد من قبيلا .. كان كايحس بقلبو كايتقطع لقطع صغيرة الشيئ لي خلاه
يقاطعهم و يحنحن حيت ماكانش قادر يزيد يشوف ريماس بين أحضان راجل اخر واخا يكون
أرسلان و مع انه خوه
أسوار : كانظن كون هبطتو ريدوات و شعلتو ضو خافت شوية كان غايكون الجو أكثر
رومانسية
أرسلان : خليت هادشي حتى لنهار اخر ا خويا العزيز .. شفتك وصلتي لهاد الطابق محتاج
شي حاجة؟!
أسوار : بغيت نهضر مع جدي
أرسلان : جدي كايوجد راسو باش يسافر
أسوار : يسافر؟؟؟
أرسلان : و مالك تعجبتي!!
أسوار : اه ولكن شفتك باقي هنا ماغاتمشيش توجد راسك باش تسافر معاه؟؟ ... طلق من
دراع ريماس و مشا لجهة خوه و ابتسامة ماكرة مرسومة فوجهو
أرسلان : ( بإبتسامة ماكرة ) هاد المرة ماشي انا لي غانمشي مع جدي
أسوار : و شكون غايمشي معاه؟؟؟ مايمكنش يمشي بوحدو
أرسلان : غاتمشي معاه نتا
أسوار : و من ايمتا انا كنت كانسافر؟؟؟
أرسلان : جواب هادشي غاتلقاه عند جدي
أسوار : انا متأكد عندك يد فهادشي مايمكنش يبدل حاجة بحال هادي بدون سبب
أرسلان : عندي شغالاتي هنا
أسوار : ( كايشوف فريماس ) عندك شغالات نيت ... خرج من تما و خلا أرسلان متبعو
بعينيه و ريماس كاتشوف فالشر ديال أرسلان مع كلشي ... يهودي صهيوني مقطططر
أرسلان : غاتجي الخدامة تعطيك ماتلبسي و بدلي عليك
ريماس : بغيت نسولك
أرسلان : بدينا؟
ريماس : عندك الضمير بحالك بحال الناس ولا لا؟ ... خرج و خلا سؤالها معلق
♚ جالس سي أصلان فمكتبو كايشوف شي وراق حتى دخل عندو أسوار
أسوار : جدي
سي أصلان : وجدتي راسك؟
أسوار : كيفاش وقع هاد التغيير؟ ياك موالف أرسلان لي كايمشي معاك لبحال هاد
الاجتماعات؟
سي أصلان : أرسلان مشغول بمصالح العائلة ماغايقدرش يمشي معايا داكشي لاش غاتمشي
معايا نتا لي وليتي غير جالس مابقيتي كادير والو
أسوار : ولكن ا جدي و المعسكرات لي كنت كانتكلف بيهم؟؟
سي أصلان : باغيني ندي معايا شي حد اخر؟؟ مابقيتيش قادر على هاد المكانة علمني و
انا غانعرف لمن نعطيها
أسوار : ايمتا غانسافرو؟
سي أصلان : اليوم فالعشية
أسوار : واخا ا جدي ... خرج من تما و هو متأكد 100% هادو فعايل أرسلان لي بغا
يبعدهم على القصر بجوج ... يتبع
البارت 239 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
وصل الوقت لي غايمشي فيها سي أصلان و أسوار العائلة كاملة كاتودعهم
سي إيتان : ايمتا غاترجعو؟
إليان : غاتعطلو ا جدي؟؟
سي أصلان : شفتكم باغيين غير تهناو مني كاتسناوني غير ايمتا نمشي ( بصرامة ) ديرو
فبالكم ايلا مشيت انا كايبقا الخليفة ديالي حفيدي أرسلان و عاطيه الحق يتصرف
فغيابي
أرسلان : جدي متأكد ما باغيش نمشي معاك؟!
سي أصلان : هاد المرة غادي يمشي معايا أسوار لعل و عسى يجمع راسو ( خنزر فأسوار )
و كيف قلت لك البارح نتا عندك بزاف مايدار هنا ركز لي على داكشي لي كلفتك بيه
#Flash_Back_to_yesterday
جالس سي أصلان فالجردة حاط نضاضرو و هاز جورنال فيديه كايشوف اخبار الحلفاء ديالو
و المصائب العالمية فين وصلات حتى حس بشي حد جلس فجنبو
أرسلان : ( بهدوء كعادتو ) مورغان بدا كايكبر إمبراطوريتو
سي أصلان : هادشي لي لقيتيني كانشوف فيه دابا
أرسلان : همم
سي أصلان : مادخلاتش ليا للدماغ هاد التطور السريع لي ولا عندو مؤخرا فتوسيع
الثروة ديالو
أرسلان : حاجة طبيعية غادي يوسع امبراطوريتو و هو كايعقد تحالفات مع حلفاء جداد
سي أصلان : ( بإستغراب ) اش كاتقصد
أرسلان : الأسبوع لي داز كان فأمريكا و عقد تحالف مع عائلة كوك
سي أصلان : و هو اش وصلو ليهم و كيفاش ماعلمناش؟؟؟
أرسلان : ( ببرود ) كايلعب بذيلو و قريب نقطعو لو
سي أصلان : ( بعصبية ) الغدااااااار باغي يدير تحالفات خرا من مور ضهري باش يدمرني
أرسلان : حذرتك منو و ماسمعتينيش لحد الساعة فمدة 5 شهور عقد 4 تحالفات من مور
ضهرك
سي أصلان : بلا مايفكر ايلا كانو هادوك من اعدائي ولا لا؟؟؟؟؟؟ خاصنا ضروري نديرو
شي حاجة مايمكنش
أرسلان : نتا لي منعتيني باش نقتلو .. كون خليتيني ا جدي كاع ما كنا غانوصلو
لهادشي
سي أصلان : لاا ماغاتقتلوش باقي عندي بيه الغرض حي و ايلا قتلتيه غايتحول الشك
لينا بحالا كانحاولو نتخلصو من شركائنا فمنظمة الماسونية .. قضية دوك 3 لي قتلناهم
دازت و ماشك حد و سمعتنا بقات مزيانة ولكن ايلا قتلنا مورغان غادي يوقعو مشاكل
أرسلان : لي خلق لينا المشاكل غانتبعو ليهم بكل بساطة
سي أصلان : المهم خلي هاد الموضوع عنداك تقتلو
أرسلان : مانضمنش لك
سي أصلان : أرسلان ماتخلينيش نتقلق عليك
أرسلان : فالوقت الحالي ماغانقتلوش
سي أصلان : خاصنا ضروري نتحركو
أرسلان : ماعندناش علاش نتحركو .. اغلبية العائلات لي كايحاول يتحالف معاهم هما
بنفسهم لي طالبين يكونو حلفاء معانا
سي أصلان : هدا خبر مزيان
أرسلان : ولكن كاين مشكل
سي أصلان : اينا مشكل؟
أرسلان : خاص نمشي انا وياك على ود التحالف معاهم
سي أصلان : مانقدروش نمشيو و نخليو ديك الجاسوسة فالقصر زيادة على هادشي مايمكنش
نخلي ولادي الأوفياء لي كايتسناوني غير نموت باش ياخدو الورت .. ايلا بقاو بدون
رقابة اكيد غايبغيو يلعبو من مور ضهري ...
يتبع
البارت 240 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
أرسلان : على هاد الحساب خاص يبقا واحد فينا .. انا ماغانقدرش نمشي هاد المرة و
فنفس الوقت ماغانقدرش نخليك تمشي بوحدك
سي أصلان : كنت كانفكر نخليك و يمشي معايا باك نتا عندي لك شغل اخر .. ماخصناش
نتشغلو فحاجة و نخليو الحوايج المهمين
أرسلان : بحالاش!!
سي أصلان : بغيتك ترد البال للأمور لي طاريا هنا و خصوصا لمورغان و اعمالو هنا رد
البال لكل صغيرة و كبيرة كاتوقع فعائلتو و مؤسستو و ماتنساش ترد البال لديك
الحقيرة لي الفوق مانخافش عليك عارفها ماغاتهربش ولكن و مع ذلك رد البال
أرسلان : ماتحتاجش طلب مني هادشي ا جدي حيت راني دايرو
سي أصلان : و رد البال معاك للقصر غانغيب لمدة شهر نقاد فيها أمورنا و غانرجع
أرسلان : فنظري يمشي معاك أسوار حسن ... فهاد اللحظة دخلو الشك فأرسلان شوية
سي أصلان : ( بشك ) باش نبعدو على ديك الحقيرة كانظن راك مراقب الامور هنا سواء
مشا ولا بقا غاتبقا مراقب الامور
أرسلان : لا ولكن باش يزيد فالخبرة ديالو بصفتو دراعك اليسرى ايلا بقا هاكا بدون
خبرة هادشي غايخلي لي فالقصر يشكو فصحة قراراتك
سي أصلان : زيد وضح لي
أرسلان : اغلب الاجتماعات مكلف بيهم و مامحتاجش لي يعاوني فيهم ولكن فحالة كنت
مشغول بحاجة أهم منهم و كان معاك غير أسوار .. و هو ماعندوش الخبرة الكافية واش
هادشي ماغاديش يخليهم يشكو فقراراتك مدام اختيارك للدراع اليسرى كان غالط
سي أصلان : فهاد الحالة من الاحسن نحيدو و نحط بلاصتو إيتان ولا إليان حيت عندهم
الخبرة فهادشي
أرسلان : و فنفس الوقت ا جدي تقدر تخلي أسوار فبلاصتو و تستاغل هاد الفرصة لي
كاينا دابا يمشي معاك باش تزيد ليه الخبرة ... مدة شهر كافية بالنسبة ليه
سي أصلان : و علاش مانختاصروش هادشي كامل نحيدو و نحط شي حد اخر بلاصتو
أرسلان : حيت بكل بساطة ا جدي الشخص لي غاتحط فبلاصتو كاين إحتمال كبير يبغي يستغل
المكانة ديالو و يطعنك فضهرك داكشي لاش قتارحت عليك من الاحسن يبقا فبلاصتو حيت
نتا عارفو ماشي من سماتو الغدر و ثاني حاجة باش تحافض على الصورة ديالك فأنك
ماكاتحتاجش تختار 2 مرات .. مرة وحدة كافية باش يكون الاختيار صحيح
سي أصلان : عندك الحق فهادي .. فهاد الحالة غادي يمشي معايا اسوار من الاحسن
#The_end_of_Flash_back
أرسلان : رد البال للدوا ديالك و ماديرش مجهود كبير ... شاف فيه أصلان و رتب ليه
على كتفو و بتاسم بإفتخار
سي أصلان : واخا رجعتيني لصحتي باقي كاترد معايا البال لصحتي
أرسلان : حاجة طبيعية ا جدي علاش شحال عندي منك
سي أصلان : انا محظوظ بزاف حيت عندي حفيد بحالك
غابريال : غاتبقا بلاصتك فالقصر كبيرة مدة طوييلة مابقيتي سافرتي
سي أصلان : غير تهنا ا ولدي غابريال شهر و هاني معاكم ماتفرحوش بزاف ... توادعو و
خرجو من القصر موراها كل واحد رجع يقضي شغالو ...
❤يتبع
البارت 241 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
♔ نمشيو لعند ريماس لي كانت خرجااات من البيت كاتقلب على مالك حيت لحد الساعة خوتها
غابرين و مزال ماجابوهم .. العشية تعاشات و الليل بدا كايطيح سمعات صوت الخطاوي و بقات
فبلاصتها تشوف شكون طالع باش تهضر معاه يجيبهم
أرسلان : اش كاديري هنا!
ريماس : والو
أرسلان : خوتك بداو العلاج ديالهم
ريماس : كيفاش بداوه ياك غادي تبقاو تعطيوهم دوا و هما معايا
أرسلان : لا
ريماس : ايوا و انا؟؟؟
أرسلان : حتى ديري عقلك
ريماس : ياك واعدتيني؟؟؟؟
أرسلان : ماواعدتكش
ريماس : ماتكدبش عليا فين خوتي؟؟؟ و كيفاش غايتعالجو و هما بعاد عليا؟؟؟ انا
متأكدة بغيتي تبعدهم عليا بلعااااني غير باش تعدبنيي
أرسلان : رجعي لبيتك .. مد يديه لجهة شعرها خشا صبعانو فيه و بقا مهبطهم حتى وصل
اللخر ديال شعرها
ريماس : جاوبني علاش كاتتهرب
أرسلان : شعرك زاد طوال .. تجاوزها و مشا لجهة جناحو غير مبالي لريماس لي بقات
تابعاه و كاتهضر معاه يعطيها غير جواب باش يريحها فقصها بل عصبها واش هي غاتحماق
باش تعرف حالة خوتها و هو كايهضر على الشعر تبعاتو و ماسكتاتش من الأسئلة
ريماس : قوليا غير واش غايتعالجو؟؟؟ واش ماكاينش خطورة عليهم؟؟؟؟؟ هضر علاش
ماكاتجاوبنييش ... دخل للجناح ديالو و تبعاتو دخلات و يا رييتها مادخلات حيت جنو و
جنونو لي يدخل لجناحو و خصوووووصا العيالات حيت عارفهم فيهم تبقشيش بزاف و يقدرو
يخليو زغب شعرهم طايح فشي بلاصة تما و هو كايبغي الجناح ديالو ديما يكون مرتب و
مافيهش نقطة ديال الغبرة ولا زغبة .. لدرجة بلاصة مايدير خدامة لي تبقا تخمل ليه البيت
كلف خدام هو لي كايخمل ليه البيت باش يتجنب زغب الشعر يبقا دالع فالجناح ... و
بالرغم من انه ماكايحملش يشوف زغب العيالات فحوايجو و فجناحو إلا ان شعر ريماس
مايقدرش يشوفو بلا مايخشي صبعانو فيه ولا يدوز يديه عليه .. دخل لجناحو و بقا
كايتمشا و فواحد اللحظة توقف
أرسلان : وقفي
ريماس : ( باقا داخلة ) واش انا غانبقا تابعاك؟؟؟؟ بغيت نعرف حالة خووتي شحال
غايبقاو و هما كايتعالجو؟؟؟؟ ... ضار لعندها بالعرض البطيئ ميل راسو شوية
أرسلان : دخلتي لجناحي؟!
ريماس : ( ربعات يديها ) اه دخلت حتى نتا كادخل لعندي بدون إذن
أرسلان : ( بدا كايقرب لعندها بخطوات بطيئة ) و بدون إذن!! ... شافتو كايقرب و
كايسولها بحالا كايتأكد
ريماس : جيت غير نسولك هدا ما كان
أرسلان : قربي لعندي
ريماس : لا
أرسلان : قربي نهضر معاك و سيري
ريماس : لا غير هضر كانسمعك ... جا يشدها صدقات طارت حيدات سوارت من الباب و خرجات
سدات عليه من برا خلاتو لداخل فالجناح ديالو
أرسلان : ريماس حلي الباب
ريماس : غير نتا لي كاتعرف تحبس بنادم ماغانحلش
أرسلان : ريماس راه لاخرجت من هنا
ريماس : لي غانديرو لك ماغانعاودو لك ياك هادشي لي كنتي باغي تقول واخا حتى تخرج و
ديرها
أرسلان : حلي الباب راه لاخرجت غانندمك على هادشي .. قلبات الدورة غير مبالية
لهضرتو و تهديداتو ياك حتى هو ديما حابسها مرة فالشقة مرة فالمعسكر مرة فالخيمة
شنو زعما هو يبقا حر طليق ... زاد كمل عليها فاش ماكانش كايجاوبها على اسئلتها ...
خطات اول خطواتها و فيديها سوارت كاتلعب بيهم و إبتسامة الانتصار مرسومة على
شفايفها .. و ما هي إلا ثواني حتى سمعات شي باب تفرعات .. ضارت لعندو بالعرض
البطيئ لقاتو خرج من الجناح ديالو .. الأسد ماكايخلعش بنادم فاش كايكون محبوس
فالقفص ديالو ولكن فاش كايخرج من القفص ديالو و هو مغدد على البشر تما فين كايكون
الخوف ... يتبع
البارت 242 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
أرسلان : ( بهدوء ) أجي
ريماس : لا اجي نتا
أرسلان : ( بهدوء ) اجي نهضر معاك
ريماس : ( بنفس نبرتو ) لا
أرسلان : ماغاتجيش؟! .. بقا غادي لجهتها بخطوات بطيئة فعلا الهدوء ديالو كايدخل
الرعب للأنفس و الشيئ المنتظر منو فالوقت الحالي هو غايخلي فيها شي عاهة مستديمة
ولكن هادشي كان غايوقع لشخص اخر ايلا كان فبلاصتو ولكن يا ترى اش غاتكون ردة الفعل
ديال أرسلان فهاد اللحظة .. بقات واقفة فبلاصتها و متوقعة منو اي حاجة وصل لعندها
وقف قبالتها بقا كايتمعن النظر فيها مدة طويلة و بدون سابق إنذار جرها لعندو و
عنقها بقوة ... " #السعادة_العشق_الغضب_ايلا_تجمعو_فشخص_واحد_فمرحبا_بالهلاك "
... جميع الحوايج لي خاصهم يخليوه يكرهها مجموعين فيها هي سبب غضبو هي سبب خسارتو
فالحرب .. اصلها ماكايحملوش .. دينها ماكايحملوش ولكن بلاصة مايكرهها قلبو ختار
طريق خرا .. تصدمتو من ردة فعلو ياك؟ ولكن هو ماشي غير جا و دار هاكا .. دار هاكا
حيت قبل مايتصرف اي تصرف ضرب الحساب لشحال من حاجة فهاد الفترة لي عرفها فيها فهم
طبعها مزياااان .. هي واحد الشخص لي ماكايمشيش بالعصى و التهديد بحال الحمار و
فنفس الوقت ماكايمشيش بالخاطر و الدلال .. طبعها صعيب و معقد يعني ايلا ناض و ضربها
و سبها مستحيل تولي المرأة لي بغاها تكون واخا ينوض لها واليديها من القبر ..
مادفعاتوش ماعرفاتش السبب لي خلاها مادفعوش يقدر يكون كاتفكر فشي حاجة و يقدر يكون
كاتساير و يقدر و يقدر و يقدر ولكن هاد رد الفعل ديالها عجبو نوعا ما .. بدات
كاتشم شي حاجة و فاش تأكدات من شنو شمات بدون اي سابق انذار دفعاتو عليها و علامات
الغضب مرسومين فوجهها
ريماس : ( بغضب ) ماشي غير يهودي لا و زوينة سكايري ولكن اش غانتوقع منك ... حطات
ليه السوارت فيديه و خلاتو و مشات .. دوز يديه على وجهو و رجع للجناح مافهمش شنو
لي مصبرو عليها لحد الساعة .. دخلات لحياتو روناتها ليه و ماخلات حتى حاجة
فبلاصتها حتى من جناحو ا عباد الله لي عمر دخلات ليه حتى مو ولا مرتو بإختصار عمر
دخلات ليه شي ابنة حواء ها ريماس جات و ماقالتوش عليها حتى هو دخلات و خلات فيه
بصمتها و بصمة نيييت خلاتها ... ها الباب تفرعات دابا .. هز طيلي دوز نمرة ابراهام
باش يتكلف بالأشخاص لي غايصلحو الباب و خرج من تما هبط لتحت
ريماس : سكايري لاخر حتى الدين ديالو ما شادوش نيشان على اساس انا ماعارفاش بلي
دين اليهودية محرم الشراب .. تفوو .. بدات كاتشم فراسها واش لصق فيها ديك الريحة
مع العلم راه ماكانتش الريحة فحوايجو غير جغم من واحد الكاس و بقات ريحة خفيفة
_ مالك : واش كلفك ميستر أرسلان بشي حاجة؟
أبراهام : الباب ديال الجناح ديالو تفرعات
مالك : كي دارت حتى تفرعات؟؟ مايمكنش
أبراهام : حاجة باينا غاتكون ديك العافية من مور هادشي .. الباب سنين و منين و هي
تما عمرها تخدشات حتى خدشة
مالك : المعاناة
أبراهام : سي أصلان كان عندو شك بلي ميستر ارسلان عندو علاقة معاها ولكن مابقاش
مالك : ايلا مشا حتى رجع ليه الشك و لقا بلي ميستر أرسلان كايبغيها لا محالة
غايقتلها فدقيقتها
أبراهام : و زيد عليها علاقة سي أصلان لي غاتخسر مع ميستر أرسلان
مالك : مشكيلة كبيرة و صافي
أبراهام : لي مابغاش يتقبلو عقلي كيفاش ميستر أرسلان ماتسوقش لدينها؟؟؟ نقولو
طبقتها ممكن حيت سي أصلان عاطيهم الحق يتزوجو وحدة من اختيارهم ولكن و الدين و
الاصل؟؟؟
مالك : هدا هو الحب
أبراهام : هدا راه السحور ولا مانعرفت اش دارت .. هادشي ماقدرتش نستوعبو نهائيا
كانقول ممكن يكون ميستر أرسلان كايخطط لشي حاجة داكشي لاش مخليها حية
مالك : ماكانظنش
أبراهام : علم الله اش كاين
مالك : سير سير ماتعطلش خليني انا غانمشي نطل على خوتها و نشوف فين وصل العلاج ...
يتبع
البارت 243 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
♜
وسط القصر ♜
جالس أرسلان حاط حداه مجموعة ديال الوراق و قبالتو جالسين مو أديرا و باه سي إيتان
كأنهم باغيين يقولو شي حاجة
سي إيتان : ارسلان حيد دوك الوراق من يدك بغيت نهضر معاك
أرسلان : ( عينيه فالوراق ) كانسمعك
سي إيتان : واش غاتبقا تعامل مع مرتك هكاك؟؟؟ كاتشوفها غير وقت الماكلة؟؟؟
أرسلان : من ايمتا و نتا كاتدخل فحوايج كايخصوني؟!
سي إيتان : ماتنساش راني كانبقا باباك و هاد الأسلوب لي كاتصرف بيه معايا و مع مك
بيه ماعاجبنيش و مابقيتش قادر نصبر ليه .. ولاو ابسط امنياتها تهضر معاها كيفما
كايهضرو ولاد عمامك مع واليديهم شوف فيا فاش نكون كانهضر معاك
أرسلان : سي إيتان اخر حاجة تفكر ديرها هي تبغي تفرض عليا رأيك .. قلتها و
غانعاودها عندكم ولد واحد هو أسوار .. هز دوك الوراق و ناض من تما
أديرا : ( كاتبكي ) ياك قلت لك ماتخليهش ليه يربيه اهئ اهئ ياك قلت لك واخا يكبر
ماغايتبدلش اهئ اهئ نتا لي بقيتي كاتقوليا غايكبر و غايروم لجهتنا الغلط ديالك ا
إيتان الغلط ديالك ... عنقها و بدا كايسكت فيها
سي إيتان : شششش صافي ماتبكيش
أديرا : ( بصوت مخنوق ) كيفاش بغيتيني مانبكيش و هو عمرو خلاني نحس بلي انا أم ليه
كايعاملني بحال الغريبة عليه
سي إيتان : وا صافي شششش ماكانبغيش نشوف دموعك ها أسوار و جوليانا معوضينك عليه و
كايبغيوك
أديرا : بغيت ولدي ارسلان اهئ اهئ شحال قدي نبقا كانشوفو قدام عيني و مانقدرش حتى
نعنقو بحالا ماشي ولدييي راه طرف من كبدتي ا إيتان ... بقا كايسكتها كعادتو باش
ماتزيدش تبكي حتى لواحد الشوية جات جلسات حداهم بنت فسن 19 سنة ملامحها كايشبهو
لأسوار و فحنانتها كاتشبه لأديرا .. عنقات ماماها و بدات كاتسكتها
جوليانا : ماما ماتبكيش عافاك راك كاتقطعي لي قلبي بحال هاكا
سي إيتان : اش وصلك لهنا؟؟؟
جوليانا : بابا راني كنت كانقلب على ماما حيت كايسولو عليها عيالات عمامي و
سي إيتان : ( بحدة ) تحركي مانعاااودش نشوفك هنا اش قلنا؟؟؟؟ وسط القصر العيالات
مايدووووروش هنا
أديرا : ( كاتمسح دموعها ) صافي ماتغوتش عليها جات غير تشوفني يلاه ا بنتي نرجعو
جيت بغيت نشوف غير أرسلان
سي إيتان : ردي البال لماماك و مانعاودش نلقاك كادوري هنا .. اخر مرة
جوليانا : ( حانيا راسها ) واخا ا بابا ... مشاو من تما فإتجاه فين كايتجمعو
العيالات و البنات ديال القصر و هو مشا يقضي شغالو
♔ قنطات بزاف فداك البيت .. هي واحد الشخص لي موالف الحركة موالف النشاط ماشي تبقا
24/24 فنفس البلاصة ... تشوف نفس الحيوط كاتتسنا بفااارغ الصبر تعالج باش تخرج من هنا
لا هاد المرة ماغاتهربش .. هاد المرة غاتخرج بطريقة خرا مضمونة 100% مسحات فكرة
الهرب و عوضاتها بفكرة خرا و لقاتها هاديك هي لي غاتنفعها بالحق خاصها تعالج بعدا
باش عاد تخرج حيت لي عارفة هي داك الفيروس ماعندوش العلاج .. سمعات صوت الصداع
فالطابق و خرجات تشوف .. لقات أبراهام و شي اشخاص كايصلحو الباب ديال أرسلان
ريماس : هدا نتا
أبراهام : رجعي رجعي دخلي لبيتك
ريماس : ماغانتحركش حتى نعرف خوتي شحال غايبقاو بعاد عليا؟؟؟
أبراهام : بقاي تما
ريماس : أسوار فينو؟؟
أبراهام : علاش كاتسولي على ميستر أسوار
ريماس : بغيت نهضر معاه فواحد الموضوع
أبراهام : على هاد الحساب نبغي نبشرك ميستر أسوار غايغيب شهر
ريماس : علاش؟؟
أبراهام : كيفاش علاش و من ايمتا كنتي كاتدخلي فعائلة روتشيلد غير بلا ماتزربي
قبرك كايتسناك كايتسناك ماغايهربش
ريماس : ماتخافش من هاد الناحية غانسيفطك ليه نتا اللول تجربو واش متيسع ولا لا
... يتبع
البارت 244 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
بغا يجاوبها ولكن غير سمع صوت الخطاوي جايين و هو يسكت .. صدقات غير الخدامة لي
كانت مطلعة الماكلة لريماس .. دخلات للداخل كلات و مشات دوشات .. لبسات بيجامة من
دوك الحوايج لي كانت طلعات لها الخدامة و بدات كاتنشف شعرها قدام المرايا حتى
نشفاتو و طلقاتو بدات كاتشوف طولو فين وصل ضحكات ضحكة خفيفة
ريماس : ( بإبتسامة ) فعلا طوال ليا كيما قال الصهيوني ولكن هاد المرة يعاود يحط
عليه يديه نتفاهم معاه .. خلاتو مطلوق و بقات عاوتاني كادور فالبيت مرة تجلس مرة
تنوض مرة طل من شرجم مرة تخرج ضرب دويرة فالكولوار و ترجع ..و فكرة وحدة كادور
فبالها عقل كايقولها ديريها و عقل كايقولها لا خاصك تجلسي ايلا بغيتي دوز الامور
كيما بغيتي و فاللخر كالعادة غلب داك النصف الشيطاني لي فدماغها .. خرجات من تما
كاتشوف واش ابراهام كاين مالقاتوش و تمات غادة مع الكولوار ناوية تلف الوقت فالقصر
بلا مايشوفوها ... هبطات مع دروج تعجبات من هاد الهدوء لي كاين فالقصر ماموالفاهش
و مع هاد الهدوء كايبان القصر بحال ما ساكن فيه حد ، نزلات و كانت بالضبط وسط
القصر بقات كاتحاول تبقا عاقلة على منين هبطات باش ماتصدقش تالفة حيت كيف قلت لكم
سابقا .. قصر عائلة روتشيلد عبارة على 3 قصورة مشروكين جاي قصر كبيير الوسط و
فجنبو ليمن و ليسر كاين 2 قصورة صغار عليه شوية مي تا هما كبار يعني متااااهة و
خلاص .. بقات غادة و طالقا رجليها ايوا دابا عاد حسات بلي حيدات القنط شوية ...
متبعها بعينيه كأنه لقا الفريسة لي كان كايقلب عليها
( جميع عائلة روتشيلد كايهضرو بالعبرية ما عدا ريماس و فادي و ريناد .. باش
ماتلفوش )
****** : اش كاديري هنا؟ ... لتافتات عندو بالزربة
ريماس : ( بالدارجة ) والو
إليان : مافهمتش اش قلتي بفففف مشكلة مع هاد خيتي كي غاندير نتفاهم معاها
ريماس : مكلخ عادي جدا ماغايفهمنيش
إليان : ( بالإنجليزية ) كاتفهميني دابا؟
ريماس : ( بالإنجليزية ) كانفهمك ... قرب لعندها و مد يديه ليها و إبتسامة ماكرة
مرسومة على وجهو
إليان : انا إليان ولد عم أرسلان و نتي .. بقات كاتشوف فيديه و كاتشوف فيه تزنك و
ماحملش راسو حيت يديه بقات منشورة ولكن فالأخير من مور مادوراتها فراسها مدات
يديها .. و مع هاد اللقطة خرج ارسلان من واحد الغرفة
ريماس : متشرفين
إليان : اش كاديري هنا؟
ريماس : والو
أرسلان : إليان
إليان : ( لتافت عندو ) ولد عمي أرسلان ... مشا لعندهم أرسلان و هضر بهدوء عكس
الحرب لي ناضت فالداخل ديالو
أرسلان : اش وصلك لهنا؟!
ريماس : والو
أرسلان : دوزي قدامي و نتا تسناني هاني راجع لك
إليان : ( بمكر ) كاتهضر بحالا كاتعرفها و بيناتكم شي حاجة ولكن عاذرك صدقو حتى
المسلمين عندهم الزين الفتان .. جر ريماس من يديها باش يطلعها شوية كايحس بشي حاجة
شاداها فيديها
ريماس : ( بعصبية ) طلق من يدي واش وليت بهيمة شي يشدني من هنا و شي يشدني من هنا
.. لتافت نص دورة لقا إليان لي شادها من دراعها و كايبتاسم بمكر
إليان : غاتخبع علينا هاد الزين بهاد الزربة ... ركز نظرو على يدين إليان لي شادين
لها فدراعها .. طلق من يديها و فرمشة عين جبد سلاح و تيرا ليه فاليد لي كان شاد
بيها ريماس ماترددش نهائيا فأنه يتيري فولد عمو .. حيد يديه بلهلا يطريه و بدا
كايغوت بالألم ... يتبع
البارت 245 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
تسمع صوت القرطاسة فالقصر .. و بدا صوت خطاوي الجري كايتسمعو ، ريماس غير سمعات
الخطاوي جايين مشات طايرة طالعة فالدروج باش مايقولوش هادشي وقع بسبابها و تصدق
طايحة فمشكل كبر عاوتاني
شاف شي حد شد لها فيديها و بقا كايضارب معاه و هز سلاح بينما هي بعدات من تما باش
مايلصقوهاش فيها و يقولو بلي هي سباب .. المهم قربلاتها كالعادة و خلاتهم يفكو
المشكل بيناتهم ... بقا اليان كايغوت بسبب القرطاسة و يديه كايهبط منها الدم شلال
أرسلان : ( بهدوء ) المرة الجاية لي نلقاك كاطوف بسحاتها راسك نطيرو من بلاصتو ...
جاو رجال العائلة كايجريو ... ولاد العم و عمامو
غابريال : اش طاري؟؟؟؟؟
أرون : اش وقع هنا؟؟؟؟؟ علاش اليان مضروب؟؟؟؟؟؟ ... بقا أرسلان كايشوف فإليان
ببرود و إليان كايشوف فأرسلان بحقد و كره و غضب نطق إليان و هو كارز على سنانو
إليان : ( من تحت سنانو ) كنا كانضحكو بيناتنا
غابريال : اشمن ضحك هدا لي فيه القرطاس؟؟؟؟؟؟
سي إيتان : قولو لي اش واقع هنا ... خلاهم أرسلان و طلع للطابق الفوقاني اما إليان
نساحب من تما باش يداوي يديه و هو كايتوعد لأرسلان بالإنتقام ... وصل للفوق لقاها
فغرفتها .. دخل و سد الباب بالساروت و مشا لجهتها
ريماس : شوف راه ماشي انا لي هضرت معاه هو لي جا يهضر معايا ... وقف قبالتها و نطق
أرسلان : ( ببرود ) علاش خليتيه يقيسك؟
ريماس : فين قاسني؟؟؟؟
أرسلان : ( بإستفزاز ) طلعتي رخيصة
ريماس : مانسمحش ليك تقوليا رخيصة فين كاتعرفني باش تقوليا رخيصة هاه؟؟؟؟
أرسلان : و اش وصلك لتحت؟! هضرت معاك ماتحركيش من هنا ولا لا!!
ريماس : راني بنادم و كانحس .. كيفاش غانبقا بين 4 ديال الحيوط 24/24 بلا مانقنط
أرسلان : ( بنفس الهدوء ) علاش خليتيه يحط عليك يديه!!
ريماس : حيت انا رخيصة ياك عاد قلتيها؟؟
أرسلان : جاوبي ... لا هدا غايحمقها نيت ماكاتعرفو واش كايطنز ولا كايدوي معاها
نيشان .. و هي كتر و تقول واش بغات تحشم عاد دابا تيرا فولد عمو من عائلتو و
ماحارش فيه ماقالتش راه يقدر يتيري فيا تا انا و يسيفطني قبل الوقت
ريماس : هههه و نتا؟ شحال من مرة قستيني بدون مانبغي واش تبغي نحسبهم لك؟؟ ... مع
العلم لمساتك ماكانوش سلام باليد بحالو .. كل مرة و اش كادير و كل مرة فين .. نتا
مرفوع عليك القلم ياك؟؟؟ ... بدا كايحس بدمو كايغلي معاها فكل مرة كايقول راه
ماغايتعصبش كاتزيد تعصبو و اغلبية اغلبية هادشي ايلا ماقلتش فجميع الاوقات ... فاش
كايتعصب كايتعصب غا معاها حيت كيف قلت سابقا مع الناس لاخرين ماكايعطيهمش فرصة
يعصبوه حيت قرطاسة فالراس كاتحل المشكل كامل ... ولكن مع ريماس راه غير مانعرفت
كيفاش و صافي .. بقا كايشوف فعينيها لعل و عسى تحشم و تحدر عينيها ولكن هي بنفسها
كانت كاتتسنا الجواب منو
أرسلان : حذرتك باش ديري عقلك ولا لا؟! سخيتي بحياتك دغيا ياك!!
ريماس : باغيني نخاف منك؟؟؟؟ علاش حيت سيدهم ارسلان مركب فيهم الرعب ... قتال ...
مجرم ... ماكايرحمش ... متوحش ... عنيف لأقصى درجة و اكبر دليل اش درتي فولد عمك
ولا ولد خالك ولا مانعرفت ليه ... ضحك ضحكة خفيفة بالصوت بقات كاتشوف فيه بإستغراب
و معجبة فلحظة شكات فيه واش عندو انفصام فالشخصية عاد دابا كان كايبان معصب و دابا
كايضحك .. ولكن عند ارسلان كانت عندو وجهة نظر اخرى ولا نقولو كان فحالة اخرى شبه
مغيب بفعل سحر عينيها لي كايبغي يبقا غير يشوف فيهم واخا نظراتها ليه كلها غضب و
حقد و كره ولكن بريق عينيها من ديما كايسحرو و يجذبو و يخليه يغيب على العالم
الواقعي لفترة قصيرة من الزمن ... قرب منها و نطق بنبرة خشنة
أرسلان : تليقي تكوني مرات الأرسلان .. كاتعجبيني فاش كاتكوني متمردة قادرة دافعي
على راسك ( عاود بتاسم ) ولكن ماشي انا لي كاتتعامل معايا المرا بهاد الطريقة و
خصوصا ايلا كانت ( بصوت خافت ) مراتي ... هاد الجملة او بالأحرى هاد الكلمة
اللخرانيا دخلات ريماس فصدمة و حسات براسها بحالا شي حد جمعها معاها بتصرفيقة ...
مشاعر مختلطة و الاحساس لي ضرها و ميزاتو من بين احاسيسها هو فاش نطق هاد الكلمة
حسات بنغزة فالقلب بحالا تخشات فيه شوكة .. واش هي ماكاتحملش حتى يكون حداها عساك
تتخيل راسها مراتو؟ مجرد التخيل ماقادراش تخيلها تجمع فيها الغضب حتى تجمع و
نطقاتها فمرة وحدة بكل كراهية .. و اخيرا قدر يتقبل داك الإحساس الدخيل و طلق
العنان ليه يدير فيه ما بغا حست ماشي هو لي كايمنع راسو على شي حاجة عاجباه و
باغيها .. و مدام تقبل هاد الاحساس بدون مايراعي للعقبات الكثيرة لي كاتسناهم إلا
و انه ماناويش يخلي ريماس من الان فصاعدا .. قدر يفهم راسو و قدر يفهم اش باغي
ولكن لي ماقدرش يفهم هو ان هداك الاحساس لي جاه ماشي فقط حب تملك و إنما حاجة خرا
ريماس : ماشي مراتك و مايشرفنيش نكون مراتك نتا مريييض و كافر و صهيوووني
القتاااال ... نموووت و يسلخو لي جلدي على لحمي و انا حية و مانقبلش نتزوج بواحد
بحالك .. زادت فيه فهاد اللحظة الشيئ لي خلاه يتعصب .. شدها من دراعها و زدحها مع
الحيط
أرسلان : تجاوزتي حدودك بزاف و انا مابقيتش قادر نبقا صابر لك من الاحسن تتعلمي
الاحترام ا ريماس
ريماس : وي فعلا راني تعلمت و بزاااف كاع
أرسلان : شنو تعلمتي؟!
ريماس : فاش نطلاقا بشي وحدين بحالك فالمستقبل غانحاول نبقا بعيدة عليهم بعشرات
الكيلو مترات لا بمئااات الكيلو مترات .. بقا كايشوف فيها ببرود عكس اش واقع
فالداخل ديالو ... شاف فيها مطولا بنظرات غريبة و خرج من تما مخليها تستوعب هاد
الصدمة لي جابت لها الضحكة و ماقدرش عقلها يتقبلها ... يتبع
البارت 246 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
داك النهار كملاتو غير فالبيت .. نسات خوتها و نسات المرض و نسات كلشي عقلها باقي
مصدوم مع الهضرة لي قالها أرسلان فالصباح .. كاتفكر غير شنو دارت حتى ولا كايتصرف
معاها بهاد الطريقة .. ياك هي ماغواتوش و ماحاولاتش و حتى مجرد التفكير مافكراتش
فيها نهائيا .. حتى من هضرتها معاه ماكانتش كاتتحلون و تتقمص دور الدلوعة و
الانوثة ياك هضرتها لي كيف السم كان المفروض مايكونش هادو هما نتائجها .. تصرفاتها
معاه براسهم كانو كايدلو بلي كاتكرهو و حاقدة عليه .. شنو زعما يكون طاح فيها حيت
مابذلاتش مجهود كبيير باش تصدو فاش كان كايتقرب منها؟؟ واش فعلا ديفو منها؟؟ ..
شيئا فشيئا بدات كاتلوم راسها حيت فنظرها ماكانتش كادير المجهود الكافي بالقوة
الجسدية الكافية لي تخليه يبعد عليها و مايعاودش يقرب ليها مستنكرة قوتو الجسدية
لي كاتفوق قوتها الجسدية أضعاف و أضعاف .. نقولو تقدر تطبق اش كاتعرف على شي واحد
اخر و تغلبو ولكن أرسلان؟! .. أرسلان لي ماكايحتاجش سلاح باش يقتل بنادم بيديه و
مايحتاجش سلاح باش يواجه شحال من واحد كي غادير تغلبو؟! من غير لاخدمات معاه
الحيلة .. قررات تتفادى يطلاقاو من هنا الفوق حيت مدام قالها هاد الهضرة إلا و ان
تصرفاتو من هنا للقدام غايزيدو عند حدهم ولكن بيان سيغ ماشي هادي اخر مرة تهبط
لتحت
ريماس : اليهودي كيفاش قدر يقولها؟؟؟ بكل برودة نطقها بحالا .. بحالا .. بحالا ..
تفوووووو .. شوية دق مالك و كانت معاه بنت باينا فيها ممرضة
مالك : ( بالدارجة ) ريماس ممكن ندخل
ريماس : ( شافت فيه ) دخل دخل
مالك : جيت ناخد عينات من الدم ديالك على ود العلاج
ريماس : مالك ماديرش ليا كيف دارو و تخلي قلبي محروق على خوتي قوليا فينهم هما
بالضبط؟؟؟؟؟ ايمتا غاترجعوهم؟؟؟؟ ماتكدبش عليا
مالك : ( تنهد ) ماتخافيش عليهم راهم فأمان كايتعالجو غير يساليو العلاج و
غانجيبوهم
ريماس : و علاش ماخليتوهمش معايا؟؟
مالك : عطي يدك للفرملية باش تاخد العينة ... مدات لها يديها
ريماس : ديك المرة قلتو عندي 2 امراض شنو نوع المرض التاني؟؟
مالك : الصمت
ريماس : شنو ناويين ديرو فاش غانساليو العلاج؟؟
مالك : داكشي غايقررو سي أصلان و ميستر أرسلان
ريماس : ( بإستهزاء ) فأخر يامي ولاو اليهود لي كايتحكمو فحياتي
مالك : قبل ماننسا
ريماس : شنو
مالك : ميستر أرسلان بغا يشوفك فالجناح ديالو
ريماس : تحفة فنية انا باش يشوفني؟؟ ياك عاد البارح ماعجبوش الحال علاش دخلت
مالك : داكشي لي قاليا قلتو لك
ريماس : لا مابغيتش و مابقيتش باغا نشوفو
مالك : ريماس راك مابقيتيش فبلادك و مابقيتيش حرة طليقة .. البلاد لي راك فيها
دابا مختلفة على بلادك و خاصك تعرفي و تتفهمي البلاصة لي نتي فيها دابا .. حاولي
ماتقصحيش راسك هادشي ماكانديروش على ودك هادشي كانديرو على ود ميستر أرسلان
ريماس : مابغيتش
مالك : يقدر يكون بغا يهضر معاك على حريتك
ريماس : ( مخنزرة ) كاتحاول تقنعني دابا؟؟
مالك : كانحاول نرجع لك عقلك .. خرج من تما و مشا
♟كانت جالسة شيرا كاداوي ليه يديه بالتخبيعة و قلبها كايتقطع عليه
شيرا : علاش واجهتيه علاش ا إليان ياك قلت لك عطيه التيساع ماتقربش لجهتو
إليان : غانندمو ا شيرا غا نندمو
شيرا : نتا عارفو يقتلك و يمشي فجنازتك واش مشيتي مكانتو عند جدنا؟؟؟ واش نسيتي
مكانتو فالقصر؟؟؟؟ شكون غايتجرأ يحاسبو من غير جدي؟؟ و حتى جدي ماكاينش دابا و هو
لي واخد بلاصتو
إليان : ( بعصبية ) واش بغيتيني نسمح فحقي و حقك؟؟ نسمح ليه حيت قاس ليا حبيبتي و
البنت لي كنت باغيها تكون ام ولادي؟ واش عارفة اش كاتخرجي من فمك ولا لا؟ ...
حبسات فداكشي لي كانت كادير و جمعات يديها عندها و حنات راسها
شيرا : ماقاسنيش لحد الساعة .. توسعو عينيه بالصدمة
إليان : كيفاش؟؟؟؟ واش كاتقصدي لحد الساعة مزال ما؟؟
شيرا : ( بصوت باكي ) اه ... حس بفرحة فقلبو عارفها ماكاتكدبش عليه حس برجولتو
باقي محافض عليها ولكن بلاتي علاش هي كاتبكي؟؟
إليان : شيرا حبيبتي علاش كاتبكي؟؟؟
شيرا : ذلني ا إليان ذلني و جرح لي كرامتي اهئ اهئ اهئ ... يتبع
البارت 247 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
إليان : ( بغضب ) اش دار لك؟؟؟؟؟؟؟؟
Flash_Back
أرسلان : سبقيني
شيرا : ( بتوتر ) فين؟؟
أرسلان : فين فنظرك!! طلقي راسك
شيرا : واخا ... سبقاتو للناموسية جلسات و هي ماحاملاش راسها ولكن فالأول و الأخير
هدا كايبقا قرار الجد و قرار رجال العائلة لي مايمكنش و عمرها كانت و عمرها تكون
.. شي مرا تتدخل فقراراتهم
أرسلان : ( ببرود ) تعراي .. قالها بديك الطريقة و بديك البرودة و بداك المصطلح
كأنها متعودة عليه حشمات و ماكرهاتش تتشق الارض و تسرطها
شيرا : واخا ... بدات كاتحيد فداك شوميز دو نوي بثقالة حتى خلاها تقفز بنبرتو
الخشنة
أرسلان : غا نبقا كانتسناك الليل كامل!! طلقي راسك خلاص .. ستجابت لأوامرو و
حيداتو بقات قدامو عارية كيفما تزادت حنات راسها كاتتسناه يدير اش بغا .. بقا واقف
كايطلعها بنظرات و يهبطها بنظرات جبد طيلي ديالو صورها هكاك و رجعو للجيب عاد قرب
لعندها ... تقابل وجهو مع وجهها و حط صبعو تحت الفك ديالها هز لها راسها و نطق
بنبرة إستفزازية
أرسلان : من حسن حظك ا بنت داوود ماعنديش مع اللحم لي لعبو فيه اليدين .. بعد
عليها مترقب ردة فعلها تجمعو دموعها فعينيها و هي كاتشوف فيه مصدومة وي عارفاه
قاسي بزاف و متسلط و مغرور و جميع الصفات الخايبة مجموعة فيه ولكن ماعمرها توقعات
غادي يوصل حتى لهاد الدرجة لي يذلها فيها مع انه مراتو و بنت عمو من عائلة وحدة
فواحد اللحظة تمنات الموت تمنات كون تزادت دري باش يحتارموها كيفما كايحتارمو
الرجال هنا .. بدات كاتغطي راسها بزربة و مخليا دموعها هوادين قدامو لعل و عسى يحن
عليها و يحبس من هاذ النظرات لي موجههم ليها لعل و عسى يسحب كلامو ولكن ماكانتش
عارفة بلي دموعها كايرجعوها قدامو مثيرة للشفقة حيت فاهمها بلي باغاه يحن و يشفق
عليها
شيرا : ( بقلب محطم ) علاش كادير معايا هاكا ... بقا كايتمعن فيها مزياااان و عقلو
خدام فالمقارنات
أرسلان : ماعندك زهر ا بنت العم إليان طلع جبان و مخبعك على العائلة
#The_end_of_The_Flash_Back
تعصب و ضرب يديه مع الحيط معصب من أرسلان لي كايذل ليه فحبيبتو و معصب من راسو حيت
كايشوف هضرة أرسلان صحيحة ماقادرش يواجه العائلة بحبو ليها .. معصب حيت فكرة ان
حبيبتو غاتكون مرات ارسلان و يعاملها كأنها مراتو كانت كوميم شوية ولكن فاش عرف
بلي أرسلان كايذل فيها بهاد الطريقة هنا دمو بدا كايفور و حس برجولتو تقاست
شيرا : ( كاتبكي ) علاش كايعاملني هاكا شنو ذنبي انا فهادشي؟؟؟
إليان : ماتبكيش غاناخد لك حقك دابا تشوفي ... بدات كاتمنعو و تمسح دموعها بيديها
شيرا : لا لا لا ماديرهاش ا إليان اهئ اهئ مابغيتش توقع لك شي حاجة صافي خليه
مابغيتش المشاكل معاه اهئ اهئ ... بقا كايسكت فيها حتى سكتات و مشا بينما هي مشات
للجهة لي فيها البنات و العيالات ديال العائلة
أديرا : بنتي شيرا اجي قربي لحدايا
جوليانا : واش كنتي كاتبكي؟؟؟
شيرا : ( بإبتسامة مصطنعة ) لا لا ماكنتش كانبكي
أديرا : ماتكدبيش عليا انا عارفة لي كاين ولكن صبري ا بنتي هو كايبقا راجل ...
تسمع صوت جاي من الجهة الثانية ديال الصالة العرييضة لي كانو مجموعين فيها كايدوزو
الوقت .. كان جاي الصوت من إمرأة فالأربعينات انيقة و هي مرات غابريال الرابعة
أمايا : سمعت بلي شي وحدة برانية تلفات ولادك ا أديرا
أرمين ( مرات أرون ) : واش هادشي بصح؟ حتى انا سمعت شي هضرة بحال هاكا
جانيا ( مرات إيثان ) : انا لي سمعت و على ماعرفت مغربية الأصل
أمايا ( مرات غابريال الرابعة ) : و مسلمة من الفوق ... نقزات مرت داوود الثانية و
حطات يديها على صدرها بحالا تصدمات
تمارا : لااا ماتقوليش لينا هادشي بصاح ... يتبع
البارت 248 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
اويلي ا أديرا واس لهاد الدرجة راجلك ماقادرش يتحكم فولادو
أمايا ( مرات غابريال ) : ولادك ضارت بيهم لفعة مسلمة و نتوما بقيتو مربعين يديكم
الصراحة ماكنتش متوقعاها منهم
أرمين ( مرات أرون ) : ايوا انا بعدا ولادي كلهم دايرين عقلهم و ماشي لي جات ديرها
بيهم
أديرا : ( بعصبية ) كانعرف ولادي مزيان و هادو ماشي من فعايلهم هما يقدرو يكونو من
فعايل ولادكم نتوما نيت
جوليانا : ماما ماتعصبيش راكي عارفاهم غير نار الغيرة لي واكلاهم
تمارا ( مرات داوود ) : ايوا دابا نشوفو ا لالة أديرة دابا نشوفو
شيرا : ماما
تمارا : هاني ساكتة ماقلت والو الوقت لي غايورينا
أرمين : ايوا عنداك غير يزغبهم الشيطان و يبغيو يدخلوها عروسة للقصر
أديرا : و يدخلوها ولا مايدخلوهاش ياك هادوك كايبقاو ولادي أ أرمين
تمارا : لا لا ماغايدخلوهاش ا تمارا على ماسمعت راها مريضة و غاتموت
أمايا : الصراحة انا بغيت نشوف هادي لي قالك كايبغيها أسوار .. اما حتى ارسلان بان
ليا غير زادو فيه
أرمين : داكشي فاش شكيت حيت ولد سي أصلان اكثر واحد جدي بشأن القواعد ديال القصر
أديرا : هداك راه ولدي ولدييي انا ماشي ولد سي أصلان
شيرا : خالتي ماتعصبيش
جوليانا : واش غاتبقاو مقابلين غير ماما؟؟؟؟ و ارسلان دار و اسوار فعل قيلوهم
عليكم
امايا : أديرا اش هاد التربية؟؟
أديرا : جوليانا صافي سكتي
جوليانا : ماما وا بزاف هدا كامل حسد فيكم؟؟؟ غير حيت ماما ماتزوجش عليها بابا و
حيت خوتي هما اقرب وحدين لجدي جاتكم الغيرة؟؟؟ ماتنساوش خويا أرسلان قريب يشد
بلاصة جدي و ديك الساعة غايتبدل كلشييي
أمايا : ( بإستهزاء ) حتى يكون معتارف بيكم بعدا
أرمين : ههههه وا هانتي كاتشوفي .. الولد ماكايحتارم لا مو لا باه و باقيين
كايحلمو شي نهار يروم ليهم ... عيات أديرا ماتصبر ولكن فاللخر قاسو لها الوتر
الحساس ناضت من تما و قلبها كايحرقها و تبعاتها جوليانا بنتها
تمارة : سمعتوها اش قالت هههههه قالك فاش غايشد أرسلان بلاصة سي أصلان غادي يتبدل
كلشي
أرمين : بان ليا نسات بلي مامعتابرهمش كاينين ولكن مزيان منين فكرناها
جانيا : انا لي بغيت نشوف هو هادي لي قالك نوضات روينة بين الخوت
أمايا : واش باقا متيقة هادشي؟؟؟ ارسلان مايمكنش ينوض روينة و يتجاهل بحال هادشي
على ود مرا واش نسيتي علاياش مربيه جدو
أرمين : حرت ولكن واخا هكاك باقا باغا نشوفها ضروري باش نشبع فضولي ... بداو
كايتناقشو من موضوع لموضوع ولكن الموضوع لي كان وااضح و شادين فيه هو موضوع ريماس
♚ فجناح حيطانو فالأسود عليهم زخارف قليلة و راقية فالذهبي مع أثاث فاللون الذهبي
.. جالس فوق فوطوي كحل نفس اللون ديال عينيه و نفس اللون ديال قلبو حاط رجل على التانية
و فيديه سيجارة كاينفث دخانها الأسود فالهواء ترسمات إبتسامة خبيثة على شفتيه من
الوقيتة لي دخلات فيها و هو مترقبها بعيونو الثاقبة كالنسر .. وي جناحو لي ممنوع
تحط فيه المرا رجليها فيه ها هي وسطو دابا ... جالسة قدامو و أسئلة كثيرة فبالها
عينيها مرة عليه مرة على واحد الفاز فوق الطبيلة لي بيناتهم باش لا مشا حتى بغا
يدير شي حاجة تلقا باش دافع ... هو مترقبها بعينيه و هي مترقباه بعينيها بحالا
لاعبين شكون غايهبط عينو و شكون غايغلب .. طفا الكارو و رجع يديه اللور طلقهم على
الفوطوي .. رجع راسو اللور تقلبات إبتسامتو الخبيثة لضحكة خفيفة رجولية بالصوت ..
سمعاتها و هزات حاجب كعلامة تعجب الله يهدي ماخلق كايضحك غا بوحدو بقات كاتسناه
يهضر حيت منين دخلات و هما هاكا هي تشوف فيه و هو يشوف فيها حتى نطق بصوت خافت
ممزوج ببحة رجولية
أرسلان : ( راد راسو اللور مع ابتسامة خفيفة ) ااااه اش درتي فيا ... يتبع
البارت 249 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
نطق بهاد الجملة و سكت ... مرة مرة كايضحك ضحكة خفيفة بدون سبب هادشي فنظر ريماس
ولكن بالنسبة ليه هو .. كانو اسباب لي خلاوه يضحك ، شكون كان يقول أرسلان لي
تفكيرو كان مركز غير على توسيع الامبراطورية و حربهم مع المسلمين يولي تفكيرو
شاغلاه بنت و ماشي اي بنت بل بنت مغربية مسلمة ما هي من سهمو ما هو من سهمها ..
كاع النسا لي دوزهم فحياتو كانو كايموتو على تراب ديال رجليه إلا هي .. هي السهل
الممنوع ... هي الحلال و الحرام فنفس الوقت ... ساهل يرجعها ليه بزز منها حيت اي
حاجة بغاها كايديها ولكن كاينين عقبات و عقبات و أولهم ديانتو لي مانساهاش كاتحرم
عليه يتزوج بوحدة ديانتها مختالفة ... أصلها لي جدو ماكايحملو ماكايقبلو و حتى هو
ماكايحملش اصلها ... اما حتى طبقتها ماكانش مسوق لها .. ماعرفش كيفاش و ايمتا
دخلات لقلبو و نشرات جذورها فيه و ستولات عليه ما جا فين يفيق من التخدير حتى
لقاها غرسات جذورة صحاح فقلبو .. بمجرد ماكايشوف فعينيها كاينسا قوته و جبروته و
سلطته و حتى من نفسو كاينساها .. بريق عينيها من نهار شافهم و هما كايديرو ليه
تخدير .. قلبو طاح فشباكبيها و ولا كايعشقها تجاوزت مراحل الحب و الاعجاب نهار على
نهار كايزيد يغرق فيها .. هي العشق لي جردانو من قواه قدامها ... عينيها .. شعرها
.. ريحتها .. رنة صوتها .. ضحكتها .. تحركاتها ... ولا كايعشقهم و بإرادتو حيت هو
لي ماحاولش يمنع داك الاحساس لي كان كاينمو فالداخل ديالو ... ولات عايشة هي وياه
من تحت سقف واحد فنفس الدار ولكن قد ما هي قريبة كايكتاشف بلي هي بعيدة و واخا
هادشي كامل مامعتارفش بلي راه حب .. حاسبو حب التملك و حاط فبالو قرار باش يدير حل
لهادوك العوائق ... فالجهة الثانية كانت جالسة ريماس و عقلها غير كايفصل و يخيط
فكيفاش تخليه يبعد عليها كيما بعد الله السما على الأرض و الفكرة ديالها كانت
كالتالي .. تزيد تصدو باش زعما يفهم راسو و مايبقاش يدور بيها مافخبارهاش بلي راه
هادشي بالضبط لي كايخليه يزيد يغرق فيها ... و بدون اي سبب جاها سؤال فالذهن
ديالها شنو هي ديك الحاجة لي فالداخل ديالها ماكاتخليهاش ترتاح ليه؟؟؟ و كاتخليها
تنفر منو حق واليديها خداتو و نتاقمات ولكن و مع ذلك هدا بالضبط شي حاجة فيه
مامخلياهاش ترتاح ليه .. فعلا كاتميل ليه واحد الشوية و هادشي ترجماتو لداك
الإعجاب لي كان بشخصية إيفا لي كرهاتها ولكن شي حاجة فالداخل ديالها كاتمنعها
ماعرفاتش شنو هي بالضبط؟ ياك واحد بحال أرسلان كاع البنات كايتمناوه و كون كانت شي
وحداخرا فبلاصتها قالها ديك الهضرة اكيد كانت غاطير من الفرحة ولكن هي لا عاد
مازاد تزير عليها قلبها .. قطعات هاد الصمت بسؤالها
ريماس : قاليا مالك بغيتيني ... رجع قاد جلستو و شاف فيها
أرسلان : عارفا ايلا تشافيتي غاتموتي نتي و خوتك ياك؟!
ريماس : و منين غانموتو غانموتو علاش كاتعالجنا؟؟
أرسلان : رشقات لي
ريماس : ( بصوت خافت ) حقير
أرسلان : كاتجامليني بزاف هاد اليامات
ريماس : الصمت
أرسلان : قضية الصباح مانبغيش نعاود نشوفها
ريماس : اينا قضية؟؟؟ ... ديال الصباح؟؟؟ راه قلت لك قنطت
أرسلان : كاين قواعد و قوانين كايمشيو عليها كاع لي هنا من صغيرهم لكبيرهم
ريماس : لي هنا ولكن انا ماشي من هنا ... غانبقا هنا مؤقتا و موراها غانرجع
أرسلان : ( ببرود ) مابقا عندك رجوع
ريماس : بطبيعة الحال ماغانبقاش هنا عايشة وسط اليهود
أرسلان : نصيحة ليك واخا ماشي من عادتي نعطي النصائح .. ولفي العيشة هنا ، من هنا
الفوق هادي هي بلاصتك
ريماس : اشمن بلاصة و اشمن عيشة؟؟؟
أرسلان : باغا تعيشي؟!
ريماس : يعيشو بعدا غير خوتي
أرسلان : واش باغا ولا ما باغاش!!
ريماس : باغا
أرسلان : مزيان ... كاين شرط
ريماس : اينا شرط من الشروط؟؟
أرسلان : ( ببرود ) تبدلي دينك نتي و خوتك ... يتبع
البارت 250 من قصة :
♚♔ العميل صهيوني و الجاسوسة المغربية ♔♚
بقلم : ♚♔ كاپيطوسة المغربية ♔♚
♚ الفصل الثاني ♚
ردة فعلها كانت عكس توقعاتو هاد المرة ... سكتات واحد المدة و بقات كاتشوف فيه بشي
شوفات كايدخلو الشك فبنادم .. وحدة من جوج يا ماعارفش طبعها كي داير و جوابها كيف
غايكون ... يا فبالو شي حاجة خرا من مور هاد الطلبات و خصوصا بهاد البرودة لي ولا
كايقولها لها بيها .. كادخل الشك فالراس و بالخصوص هاد الهضرة لي قال دابا 100%
موراها شي حاجة و الهدف ماشي انه يخليها تبدل دينها عندو شي هدف اخر و غاتعرفو ...
قررات ماتسرعش و تجاوب بهدوء عكس داكشي لي فداخلها
ريماس : لا ماغانتبعش شي حاجة ماكايناش
أرسلان : فهاد الحالة بداي تحسبي لأيامك لي باقية ليك
ريماس : غانحسبهم من دابا
أرسلان : ڭولي داكشي لي عندك
ريماس : ( ربعات يديها و صغرات عينيها ) انا ماشي مكلخة باش يدوز عليا هاد السؤال
هاكا ا سي أرسلان ... حط اصبع السبابة على فمو و نطق
أرسلان : واحد الحاجة لاحظتها فيك
ريماس : اينا حاجة من الحاجات
أرسلان : من نهار عرفتك عمرني شفتك كاتأدي فريضة من الفرائض لي فارضهم عليكم دينكم
... حسات براسها تقرصات فهاد اللحظة حيت فعلا عندو الحق منين جات و هي تسب فدينو و
بالمقابل نسات راسها حاولات تقلب عليه القفة و تدور ليه الكورة
ريماس : نفس الشي معاك ولا زعما نتا مرفوع عليك القلم؟؟؟ حالة خاصة
أرسلان : مانحتاجش نأكد لشي واحد بلي راني متبع ديني
ريماس : كاتشرب و الشراب حرام
أرسلان : كاتتعراي و العرا حرام
ريماس : كاتقتل و القتل حرام
أرسلان : كاتخالطي مع الرجال و التخالط حرام
ريماس : كاتتكبر و التكبر حرام
أرسلان : كاتكدبي و الكدوب حرام
ريماس : اليهودية اصلا كتابها محرف
أرسلان : و الإسلام ماعندوش دلائل
ريماس : و شكون قالك ماكاينش دلائل كاينين
أرسلان : غانعطيك 5 دقايق قنعيني بلي دينكم هو الدين الصحيح
ريماس : و ايلا قنعتك غاتبدل دينك؟
أرسلان : ريماس يا ريماس تجاوزتي حدودك بزاف .. ماكانظنش كون كان قال شي حد اخر
هاد الهضرة غايبقا حي من موراها
ريماس : كاتهددني؟؟
أرسلان : بغيت دليل مقنع ف5 دقايق
ريماس : و علاش غانسمع لهضرتك؟؟؟
أرسلان : 4 دقايق و 40 ثانية
ريماس : غانعطيك ادلة ماشي غير دليل
أرسلان : كانسمع
ريماس : اول حاجة القرأن الكريم لي هو كتابنا .. اكبر دليل
أرسلان : التوراة نفس الشيئ
ريماس : كانظن عمرك قريتي كتابنا باش تفهم
أرسلان : همم شنو لي غايخليني نقراه
ريماس : ماكانظنش عندك اهتمام بالموضوع ولكن كانظن غاتبغي توسع معرفتك
أرسلان : كانبان لك عندي الوقت لهادشي الخاوي ديالك؟!
ريماس : ( بعصبية ) منين ماعندكش الوقت لهادشي علاش كاتسولني ... بغات تنوض و عاود
رجعها لبلاصتها
أرسلان : ( ببرود ) مانبغيهاش تتكرر
ريماس : شنو هي؟؟
أرسلان : اخر مرة تنوضي و انا مزال ما ساليت هضرتي ولا تيقي بيا ماغايعجبكش داكشي
لي غاندير
ريماس : كاتهددني؟؟
أرسلان : همم متيقنة بلي نتي لي على صح و انا غالط
ريماس : متأكدة كل التأكد
أرسلان : عطيني شي حاجة مكتوبة فكتابكم كاتأكد هضرتك ... شافت فيه بتحدي
ريماس : كاين أيات بزاف كايأكدو هضرتي
أرسلان : كانسمع
ريماس : " و الذين يتبعون الرسول النبي الأمي الذي يجدونه مكتوبا عندهم في
التوراة و الإنجيل يأمرهم بالمعروف و ينهاهم عن المنكر و يحل لهم الطيبات و يحرم
عليهم الخبائث و يضع عنهم إصرهم و الأغلال التي كانت عليهم .. صدق الله العظيم ..
شاف فيها و نطق
أرسلان : ماكانبغيش نسمع النص .. ممكن النص لاخر يكون كايعكس كلامك
ريماس : منين كاتعرف تهضر بالدارجة كانظن قادر تقراه بالعربية و هادي لي عطيتك ما
هي إلا أية صغيرة بغيتي تزيد تقرا الباقي غاتلقاه فسورة الأعراف
أرسلان : كنت غانديرها فحالة كنت شاك فراسي
ربماس : وا راك..
أرسلان : سالات ل5 دقايق و ماقلتيش فيها حاجة منطقية
ريماس : شنو دابا
أرسلان : علاجكم غايكمل
ريماس : ( بفرح ) كنت عارفاها
أرسلان : و فاش غاتعالجو غاتكون هضرة خرا .. عطيتك فرصة ترجعي فيها للطريق و
ماستغليتيهاش
ريماس : نرجع للطريق؟؟؟؟ نتبعك اليهودية باش نتسما راجعة للطريق؟؟؟؟ فين هو المنطق
فهادشي
أرسلان : عرفتي شنو هي احسن حاجة درتيها
ريماس : ماسمعتش لهضرتك
أرسلان : خليتي تخربيقكم بعيد على القصر .. بقات كاتشوف فيه بحقد كيفاش أهان
ديانتها
ريماس : ( بعصبية ) ديني ماشي تخربيق هزات ... يديها حتى للسما و بغات تنزل عليه
بتصرفيقة ، مع بغات تصرفقو تسمعات طرطقة و تبعها صوت صرخة قوية تسمعات حتى للطابق
الثاني إثر تهريسة لي هرسها من اليد لي هزاتها عليه ... يتبع