🦋 قصة قصيرة🦋
بعنوان : ~👵🏻تاشرفو عاد هرفو👵🏻~
بأنمال : Chaimae_Zr & Ibtissam Elkahlaoui
•••في أي درب مغربي ككونو عندنا شي حضايات او كيف كنعتهم أي مغربي"الراضارات" "'كاميرات"
بطلات قصتنا جوج فردات مكتفارقوش شيبانيات.. شوهة ونميمة وتبركيك هي خدمتهم
و الحدث المهم و المميز ف قصتننا هو أنهم جاتهم المراهقة المتأخرة 🙂
القصة كـــــوميدية ألف فالمئة🧡
بقلم : Chaimae_Zr & Ibtissam Elkahlaoui
👵تاشرفو_عاد_هرفو👵
🌸 الجزء : 1
فواحد الدرب شعبي بامتيااز في مدينة بني ملال..
كباليك جوج شيبانيات جالسات قدام العتبة ديال باب الدار...
وشادين فيديهم زريعة...
ودنيهم واقفات..وعينيهم محلولات...
شادين العسة...
او بعبارة أخرى..."كاميرات الدرب"
لي داز من حداهم ضاروري ينممو فيه..
الكنبوشية :
شوفي أعشيرتي هادي لي دايزة راه هي زهور النكافة لي كانت قوسات على لعروسة بنت سي لعربي ..تاطاحت من فوق العمارية وجات على خنافرها
الدريسية :
تتقاد فعكافتها...
انا ياختي متنحملهاش واخا يغمسوها ليا بالعسل لحر شحال فيها ديال الشيكي ...
الكنبوشية :
نوضي نوضي خركي عليك جلابيتك وياله نسرحو رجلينا هاد درب مفيه ميدار نطلعو لعين سردون دابا من ورا لمغرب تتكون زينة ومفوجة...
(نخليو هاد الجوجات يلبسو حوايجهم واجيو تعرفو عليهم...)
الدريسية والكنبوشية كيعرفهم الصغير والكبير ...كعتابرو كاميرات درب نامبر وان...
وشوهة ونميمة هي خدمتهم...
جاتهم المراهقة المتأخرة ....
ولكن واخا شارفات باقات عاطيات العين...
ومدوزين 36 عام ديال العشرة..
الكنبوشية أرملة راجلها مات وولادها عايشين في الخاريج وهي بقات بوحدها أما الدريسية فراها باقا بايرة مزال ملقات فارس أحلامها ولي غادي يستاهلها كيف كتقول .
ناضو جمعوا لوقفة دريسية لبسات جلابيتها ودارت زيفها...وسرحو رجليهم لطريق...
شدو طاكسي حتى لعين أسردون..ضارو وتساراو..وطلعوا لقصر..
لكنبوشية: احح اربي هاد الطعلة ديال القصر شحال كتجيب الدوخة اري ديك البصلة لي عندك في الصاك
الدريسية:شدي شدي
لكنبوشية:
شدات لبصلة تتشمشم...تاشوية وبدات تتقوس فعينيها...
دريسية شووفي شوفي هاديك ماشي هي فاطمزهرا بنت حسن
دريسية :
ايه اعشيرتي ولاهيلا هي..شوفي فين غادية مع هداك كحل الراس جنب لخلا
لكنبوشية :
غادي باغي يتقرب من لبنت راه تقولوها فدوزيام..صوني على لبوليس يشدوهم متلبسين
دريسية جبدات نوكيا بيل ودارت رقم لبوليس ...
دريسية : حطات يدها على راسها وخشات صبعها في وذنها وهضرات
الو شاف عتق عتق راه بنت حسان غيكتاب عليها لمكتوب وغطيح روح بوها غينحرها
لكنبوشية شافتها غير تدخل وتخرج فالهضرة و نترات ليها تيلي...وهضرات مع لبوليس وشرحات ليهم وعطاتهم لعنوان...
ماههي الا دقائق وتسمعات سفارة لبوليس تا وقفو عليهم
بوليسي: فيناهوما الالة..
لكنبوشية : راهم تخشاو لهيه..
لبوليسي سيفط ربعة درجال مشاو قلبو...
بعد دقائق قليلة....رجعو ويديهم خاوين
-شاف ملقينا والو كاينين غير جوج كلاب تما
بوليسي موجه هضرتو لشيبانيات واش باغين تلعبو معانا ولا؟
براهيم ..شدوهم وديوهم هبطوهم يتكلاصاو...
يتبع..
بقلم : Chaimae_Zr & Ibtissam Elkahlaoui
👵تاشرفو_عاد_هرفو👵
🌸 الجزء : 2
الكنبوشية : شاااف اناااا مزاوكة والله مدرنا شي حاجة حسبني قد مك
الدريسية :
شااااف كنا بغينا نديرو غااالخير وهي لي قالت ليا تاصلي بالبوليس انا ممعاهاااش حق مولانا
الكنبوشية :
يااااك الحرايمة يااا لبايرة يا شارفة هادي هي العشرةة
البوليسي:
سكاااااات ...غتشدو بجات حيث بلغتو بي بلاغ كاذب....
شدوهم
وركبوهم في السطافيط مع الشماكرية وبنات الليل ..بقاو شي كطلع فشي....
الكنبوشية :(كتهضر مع واحد الولد حداها واشم وداير سلاسل في عنقو وحلقة في وذنو)
"اشهاد الحالة اولدي ويلي وليتي ولية لي داير الحلقات وهاد السلاسل ايوا الله يدينا في الضو "
لولد : هذا اجداتشي سميتشو ستايل ...
جبد من جيبو واحد بلاستيكة صغيرة بيضة وعطاها ليها بلحس..
"خودي هاادي كادو مني اجداتشي وتشفكريني"
الكنبوشية شدات من عندو بلاستيكة وخباتها فصدرها وباست يديها على جوج جوايه..
بعد دقائق وصلو لكوميسارية
لكنبوشية و دريسية نزلوهم لسيلون...
تسرحو فلأرض ولبرودة طالعة معاهم
لكنبوشية : شوفي هاد طفلة اش لابسة
دريسية : دابا هادو واليدين لي مخلينها خارجة هوكا شوف ككتلوي فالمسكة طعريجة دلعيشورة صافي
لكنبوشية : الله يدينا فضو...
.. فصباح🌸
كانو فغرفة ديال البوليسي ..كسنيو على وراق الخروج...
الدريسية: وحق مولانا الشاف تضلمتونا مدرناتاشي حاجة
الشاف: بغيت نعرف شنو كنتو كديرو فداك لوقت تما ؟ ياكماا كتشدو لبنات؟
الكنبوشية والدريسية: اعوووذ بالله الله اكبر شهاد الباطل اشااف
البوليسي: هضرو كنسمعكم
الكنبوشية: ايوا شنقوليك الشاف معرفنا هاد الباطل منين نزل
الدريسية: نعاودوها ليك كيف الخرافة اشاف طلعنا القصر حتى كتبان لينا فاطمزهرا بنت الحسن مع واحد الصلكوط غادين جنب الخلا بغيتكرفص على درية
الكنبوشية : وحنا الشاف مواطنات صالحات صونينا البوليس ملي جيتو ...غيكونو بدلو لبلاصة
يتبع....
بقلم : #Chaimae_Zr & Ibtissam Elkahlaoui
👵تاشرفو_عاد_هرفو👵
🌸 الجزء : 3
البوليسي شاد على راسو
"صافي نوضو سيرو فحالكم"
الكنبوشية :
ربي ربي أشااف!!! طلقتي صراحنااا
حطات يدها على ودنها وطلقات تزغريتة...تسمع صدى ديالها فالكومييسارية كاملة
البوليسي:
نوووضو جمعوو نوضاا عندي تنكافت هنااا ياااله
خرجو بزوجاات شادين فيد بعضهم ..وضاحكات...
الدريسية :
زييدي زيدي طلقي رجليك ليشوفنا شي واحد من درب ونتشوهو..
شدو طاكسي ووصلهم لدار...
ساكين بزوج..فدار وحدة..
الكنبوشية :
تشهيت الرفيسة العمية انوض نقادهاا لغذا
الدريسية :
بلاتي نجي نعاونك...
دخلو لكوزينة بزوجات...كتعاونها..وجدو كاع لوازم ديال الرفيسة الخ الخ ..
دريسية مشات تتقاد فالعاصير..
والكنبوشية تدير دريساج لرفيسة...
تفكرات ديك بلاستيكة لي عطاها داك لولد جبداتها من صدرها..
ورشات على الرفيسة...جابليها الله فحال لملحة ولا مساخن خخخ...
دريسية قادات طبلة حطات كيسان العاصير وديسير...وجلسات شعلات التلفازة كانت بادية واحد الصهرة دشيخات...
جات الكنبوشية..هازا فيدها القصرية وضاحكة..
حطاتها فطبلة وجلسات...هزات تيليكوموند زادت الصوت لتلفازة...كانو شيخات الأطلس طالقين تلوازهم..
بداو تياكلو ويتبنو ويتمايلو ولكنبوشية تتشكر فراسها...تضربو لقصرية كاملة وتبعوها بكاس دلعاصير...
شوية دريسية بدات تتشطح على طبلة و راسها تقيل...
الدريسية :
وماااا بغيت الشايب مبغيتو يااا لاالة يحك عليا شيبااتو تو تو هااااا اللله...
يتبع....
بقلم: #Ibtissam Elkahlaoui & #Chaimae_Zr
👵🏻_تاشرفو _عاد_ هرفو👵
🌸الجزء:4
الكنبوشية: (هازا الكراطة زعما ميكرو وكتغني)
"أنا بعدا حاضيا لبحر ليرحل..انا بعدا خاصني جيلالة ونفيق ..يمشي ويجي حاجتك مقدية ياا جلوول.."
دريسية: وهاااه هاااه هواااااا
"خوتنا يالإسلام هزوو بينا لعلام زيددو بينا لقدام.لخيابت دابا تزيان وا الرش الرررررش"
..ناضو بزوجاات حيدو لعكافات...
شيب لبيض شاد الرييزو..
تقابلو مع تلفازة توفو فشيخات..ويتلوزو فحالهم..
ومكاين غير تحياار تحيااار
"نعم نعم إنها المخدرات"
دريسية ولات تتحس براسها طايرة فسما..وولكنبوشة كثر منها..طلعات ليهوم
...دريسية شدات عندها جفاف..عنقاتو وجلسات...تدير باي باي...ومرة مرة تتحط يدها على صدرها وتقول الله يبارك فيك تتشكر وترحب...
الكنبوشية:
وقفات على راسها تتصلي على نبي فحال النكافة
"صلااة والسلاااام على رسوووول الله الاه الجايلاااه جا سيدنا محمد الله مع الجاااه العالي"
رووورووو روووووروروووووووي
الدريسية:
دارت ديك لحركة بيدها..ديال قليان سم لكنبوشية وتتغني
دييييتو وديييتو والله مخلييييتو..
الكنبوشية
: وديري علاش ترجعي هالي ثايقة في راجل
هايتووو هاايتو اباباا
بقاو على هاد لحال وحدة تكلاشي لوخرى بالقوافي .ترفعو...تاعياو ونعسو..
🌸.. في العشية ..🌸
بداو كيفيقو الشارفات...
الكنبوشية حاطا رجلها فوق راس الدريسية ..دريسية متوسدا جفاف ومعنقاه ولا نقولو قاجاه...
الكنبوشية: الدريسية
الدريسية : هممم
اكنبوشية : نوضي نوضي
الدريسية : وك وك على راسي الله الشقيقة
الكنبوشية: جيبي لكينة دشقيقة وياله نجلسو قدام دار يضربنا لبرد شويا..
الدريسية : واخا..
لاحت لكراط وناضت..جابت لكينة شربوها..وهزو كراسا وجلسو فالعتبة...
وكيف لعادة طلقو راضارات..ولداز يشدو فيه لهضرة....بقاو كنمو تاأذنات لعشا..عاد دخلو لدار..
يتبع...
بقلم : ibtissam elkahlaoui & #chaimae_Zr
👵🏻_تاشرفو _عاد_ هرفو👵
🌸الجزء: 5
🍥..في الصباح..🍥
فاقت الكنبوشية ...
ومشات كتنوض فدريسية..لفسابع نومة...وتتهتر
الدريسية:
راجلي..امم نتاحر على قبلك..اجي اجي فين غادي..
الكنبوشية :
واااااااااااااا قرزاااز ومحرااااز
اتي نوضي قالت ليك الراجل وهااااكي (صبعات ليها)
تنتاحر عليك دجاجة انشاء الله
الدريسية:
الله يعطيك تزيزين مالك اختي دايرة ليا هاد نوضة تتساليني لفلوس
الكنبوشية:
....ونوضي يالبايرة نخرجو نضورو ونتقداو تلاجة راه ولات زاوية...
...ناضت دريسية قادات حالتها ولبسات جلابيتها..لكنبوشية كدلك..فطرو وخرجو...
.... حاطين راس على راس و يشوشو وينمو...تاوصلو لوجهتهم..
فينما دازو كيقلبو وكيسولو على الثمن وفي اللخر كيقولو "نضربو دويرة ونرجعو "
الكنبوشية :
الدريسية شفتي داك المحل ديال كساوي العرايسات
الدريسية : ماالو
الكنبوشية : بغيت نجرب شي كسوة
الدريسية : زيدي زيدي ندخلو نشوفو هادشي ديالك فين غادي يوصلنا
دخلو المحل وهي تستقبلهم البنت لي خدامة فيه
"لمحال كان كبيع ليغوب ديال العرائس"
البنت: مرحبا بيكم في المحل ديالنا اش حب الخااطر
الكنبوشية : دابا كي شتي انا مزوجة راااجل خااانز فلوس ايواا قولي تبااارك الله ..تتقوص فعينها ..ودايرة ليها خمسة عند وجها..
البنت: ههه تبارك الله
الكنبوشية : ايواا وليوم ذكرى زواجنا
البنت: وانا فاش ممكن نعاونك الالة
الكنبوشية : هاني جاياك الهضرة دابا حنا كل عام كنعاودو عرسنا ايوا انا جيت لعندكم باش نختار كسوة ديال العرس
البنت: ستغربات وشداتها ضحكة ..حبساتها بزز..
"هه اه مرحباا الالة هاهو المحل شوفي الكسوة لي عجباتك"
الكنبوشية : انا وصاحبتي غادي نقلبو في الكساوي ونتي قلبي ليا على شي طالون
البنت: واخا شحال كتلبسي
الكنبوشية: طلاطة وربعين
البنت : هه اوكي مدام..
مشات الكنبوشية والدريسية كيقلبو في الكساوي وكيوشوشو
الدريسية : دخلنا عليك بالله واش تتلبسي "43"
الكنبوشية : ايه خمسة على عينيك
الدريسية : تبارك الله ..دابا هاد لبلغة لي لابسة يحركو فيها لمغاربة كاملين..
لكنبوشية : سكتي سكتي...وقولي ليها كيف جيتك
الدريسية: عشيرتي صدقتي مسويهلاش
يتبع...
بقلم : Ibtissam elkahlaoui & #chaimae_Zr
👵تاشرفو_عاد_هرفو👵
🌸 الجزء : 6
ختارت الكنبوشية لغوب لي بغات ومشات تقيسها هو والطالون لي جابت ليها البنت...
وعشيرتها دريسية بقات تتساين فيها تخرج...
خرجات الكنبوشية لابسة كسوة مفرفرة وطويلة كتجرجر وكتزيد كي بلارج مع مكتعرفش الطالون شادة في راسها غير بزز...
و الواعرة حيدات زيف حياتي وعرات شعرها لي حرام نقولو شعر وانما غير جوج زغيبات بيضين شادين الريزو
البنت (حابسة الضحكة بزز):هه احم احم واش عاجباتك الالة
الكنبوشية: ايه وغادي ناخدها شحال الثمن
البنت: 1500 درهم الالة
الكنبوشية : هي شحال بالريال
البنت : هي ثلاثين الف ريال
الدريسية: با با با با واخا نكونو باغين نشريو حولية
الكنبوشية: صلي على نبي ابنيتي وخليها ليا غير بعشرلاف ريال
البنت : لا امدام ميمكنش...
ضربات فيها اكنبوشية وزادت لمراية تتشوف فىاسها وضاااحكة...
و الدريسية غادية هازا ليها لغوب من لور وكتصلي على نبي..
زادت بغات تختمها بتزغريتة وهي تعكل فالكسوة..
الكنبوشية تردخاات مع لأرض...
الكنبوشية : واااااا لعااالي يااااااه
الدريسية: كدايراا لميمة
الكنبوشية: وااايعطيك لعيط يااا لبايرة بغيتي تقتليني الحرايمية غرتي مني حيث بغيت نشري كسوة دلعرس
الدريسية: (تتبكي وتنخصص) حق بوك وجدك مدرتها ليك بلعاني ياخيتي
موجها كلامها لمولات المحل :
اديك سفريطة عيطي على ويو ويو
البنت : سميتها إسعاف الالة..
.....
عيطات البنت على لومبيلونص وكتولول في نفسها على هاد الزهر ندمات حيث دخلات هاد الشارفات عندها
البنت: عفاك الالة عاونيني نحولوها لديك البلاصة باش نحيد ليها الكسوة وتلبس حوايجها بينما وصلات لومبيلونص
الدريسية: تي كيفاش تحيديها ليها
البنت: سمعي الالة الى بغيتو الكسوة عطيوني 30 الف ريال والله يربح والى مبغيتوش حطوها ليا
الدريسية: حق لحليب لي راضعة انا وصحيبتي لنصلتيها لييهااا
فلوس لكسوة دابا يوصلوووك ياله تهزي...
دازت ساعة عاد جات لومبيلونص..
اودي هذا هو المغرب حتى كيشبع الواحد موت عاد هي كتجي ..
هزو الكنبوشية وطلعوها ومشات معاها الدريسية حتى وصلو الكلينيك دخلو بيها نيشان لقاعة العمليات والدريسية كتبكي وتنخصص وحاطة يدها على راسها..
يتبع
بقلم : ibtissam elkahlaoui & شيماء الزركاوي
👵تاشرفو_عاد_هرفو👵
🌸 الجزء : 7
جلسات الدريسية فوق الكرسي كتسنا في الطبيب يخرج ...حتى كتوقف عليها واحد الفرملية
الفرملية : الالة واش نتي من عائلة السيدة لي يالا جابو
الدريسية : هي انا مالها عشيرتي!!!
الفرملية : ان ايه وان الله راجعون الله يبدل محبتها بالصبر
الدريسية: تي اش كتخربقي كيفاش واش ماتت
الفرملية : الله يصبرك
الدريسية : تلاحت على لأرض تتخبط فجنابها وتحير..وتلالي
الله على عشيرتي ولمن خليتيني..أهئ اهئ.. وهيااا الكنبوشية وااا رجعي ياخيتي اهئ اهئ
بيبيبيوووو مشات النجيمة ديالي الله على عشيرتي الله (دارت ليهم جنازة في الكلينيك)
خرج الطبيب من العملية وغادي في اتجاه الدريسية لولات تتمرمغ...
الطبيب: الالة يهدييك الله راه كلينيك هذا ونتي مالكي دايرة لينا جنازة هنا
الدريسية: عشيرتي الكنبوشية طاحت وجبناها في ويويويو وجات عندي واحد الفرملية قالت ليا راها ماتت اهئ اهئ
الطبيب: لا شهاد التخربيق را المريضة غير تهرسات من رجلها ودابا را غادي نحولوها لشي غرفة هنا وغادي تولي بيخير
الدريسية : ربي ربي يويويويويويويوي عشيرتي مماتتش
الطبيب: اااا شريفة را كلينيك هذا
الدريسية : سمحي ليا اسيدي راه غير لفرحة
مشا الطبيب والدريسية شافتهم مخرجين الكنبوشية وغادين بيها لواحد البيت وتبعاتهم حتى حولوها وعلقو ليها رجلها
الكنبوشية : وااا الدريسية
الدريسية : شتي فعايلك فين وصلونا
الكنبوشية : عمر داوود ميعاود
الدريسية : لا غير عاودي ااااه نسيت مقلت ليك راني صونيت لولدك رشيد وهو غادي يقولها لسلمى وأمين وليوم في الليل يكونو هنا را شدو الطيارة
الكنبوشية : علاش قلتيها ليهم غير شوشتيهم انا بيخير
الدريسية : سكتي سكتي هانتي تهرستي نيت يالا تشدي الارض شوية وتانا تحيد مني ديك نغزة
....بقاو كهضرو...او نقولو كنمو..بداو من طبيب..وتبعوهم فرمليات ديال سبيطار وحدة وحدة...
🍥.. في الليل..🍥
وصلو ولاد الكنبوشية من إيطاليا جاو نيشان الكلينيك
سولو في الاستقبال ونعتو ليهم رقم الغرفة وبقا ولدها رشيد في الاستقبال حتى خلص كاع المصاريف ..بينما خوتو مشاو لشومبر..
سلمى : الله يا ماما فين كان مخبي ليك هادشي
الكنبوشية : ابنتي غير المكتاب وصافي
سلمى: كيف بقيتي دابا لباس دادا الدريسية لباس عليك (سلمات عليهم )
وكذلك دخل أمين حتى هو سلم حتى جا ولدها رشيد حتى هو سلم وسول على الاحوال....
بقاو هكاك كيتحدثو مملوش نهائيا خصوصا الكنبوشية لي توحشاتهم بزااف
يتبع...
بقلم : Chaimae_Zr & Ibtissam Elkahlaoui
👵تاشرفو_عاد_هرفو👵
🌸 الجزء : 8
دريسية خرجات من الغرفة..
بغات تخليهم يهضرو على خاطرهم...وهي مشات لجردة تشم الهواء..
خرجات من لكلينيك..ومشات جلسات فواحد الكرسي..
تتنهد..وحاضية طوميبلات غادين جايين...
تاحسات بشي واحد جلس حداها...
كان واحد شيباني..مزال شاد فراسو..راسو قرع..ولابس سروال ديال لفصالة وقاميجة خاشيها فيه..ومعاهم صندالة...
وشاد العكاز فيدو...
جلس حداها ونطق...
"أنا جيت قاصدك ولمقصود الله مني شفتك تتبكي وتحيري تفكرت غير عشيقتي سبحان الله طبق الأصل ..وليتي فحال قطيرة العسل فقليبي.."
قلبي شافك ودق ليك..والا رفظتي هاد العبد الضعيف لقدامك راه ينتاحر على قبلك امولات داري ومت وليداتي
نتي غير طلبي وانا نفد
الدريسية :
بداات تتقوص فعينيها وضحك...
"بغيت جوج جوج من الحاجة وداري بوحدي منقبلش مك تسكن معانا وبغيت دير ليا عراسية دايزها لكلام وشهر العسل فجزر الواق واق"
شيباني : (المخطار)
" هذا مكان امعشوقتي شفتك ومخي طار هههه "
دريسية : ههههه (ضربات على كتفو) "يعطيك دل كون تحشم"
"انا لي فهمت هي نتا سمك المخطار "
المخطار : تبارك الله عليك احبي هي هاديك..
شاف فيها بعوينات معسلين ونطق..
" تقبلي تزوجي بيا"
دريسية : ربي ربي الحاج
المخطار : انحج انا وياك انشاء الله
🍥..بعد مرور أشهر..🍥
فبني ملال...وبظبط فقاعة الأفراح...
وعلى أنغام عبد الموغيت...
داخلة لالة العروسة "الدريسية " لابسة نفس الغوب لقيسات الكنبوشية خخخ..مي ماشي مع طالون..مع بلغة...ودايرة لمايكاب وشعرها جامعاه كتبان واعرة..وشادة فيدها بوكي دلورد ..وحداها مولاي السلطان لابس جبادور..شاد فيها شدت العما فظلمة..
سخننننن الطررح بالمعقوووول احححح ولعلوة العلوة...طااايح كثر من نااايض...كولشي تتمرمغ ويتحير..لكنبوشية تاهي كانت مأنتكة وهازا عكازها تتشالي بيه وتدير ديك لعيبة "هكا البارود"
بقاو على داك الحال كيرقصو ويغنيو ويشطحو فرحانين لدريسية لي اخيييرا تزوجاات
وصل الوقت لي غادي تلوح فيه البوكي ديال الورد وتمشي مع المختاار
وقفات في المنصة وكاع البنات تصافو وحتى العيالات لي بايراات ولي معندها راجل
الدريسية: واااحد زوووج ثلاااثة
لاحت البوكي ديال الورد وميجي غير الكنبوشية في وجهها شي بدا كضحك وشي بدا كصفق
اما الكنبوشية طلقاتها بواحد لالة مولاتي تزغريتة ..تنوض الميت من القبر...
جات عندها الدريسية تتجري تعنق وتبارك ليهااا...
الدريسية : ياااو خمسااا خميس عليك اعشيرتي ومبارك ومسعود وديتي لفال انشاعلاه شهر جاي غيكون عرسك وانا غنكون حاملة بتوام...
الكنبوشية : ابقينا تنترطاو تاا ضربنا ليييهم الطر العشيرة
سي عبد الموغيت اراااا عليها شي ميزااان
نوضوهااا شطيييح وردييييح مكاين غالله يعطيك صحيحتك..ولكنبوشية ودريسية طالعات فوق القعدة كشتفووو ولفرحة باينة على وجهم ولأهم ضربو طر😋
🍥النهاية🍥
تأليف : شيماء الزركاوي
إبتسام الكحلاوي...🌸